Ministria e Jashtme i kërkoi autoriteteve maqedone të identifikojnë dhe dënojnë fajtorët për sulmin që shkaktoi dëmtime të muzeut të Kongresit që përcaktoi alfabetin e gjuhës shqipe.
Ministria e Jashtme e Shqipërisë deklaroi të martën se “shpreh keqardhjen e saj dhe dënon sulmin” ndaj Muzeut të alfabetit të gjuhës shqipe, muze që gjendet në qytetin e Manastirit (Bitola) në Maqedoni.
“Kërkojmë nga autoritetet e Maqedonisë zbardhjen sa më shpejt të këtij akti vandal dhe dënimin e autorëve. Sulmet e përsëritura ndaj Muzeut janë dëshmi e kërkesës për mbrojtje më efektive të kësaj trashëgimie të përbashkët nga autoritetet kompetente,” thuhet në një deklaratë të publikuar sot.
Mediat në gjuhën shqipe në Maqedoni njoftuan se mëngjesin e të martës, njerëz të paidentifikuar kishin hedhur gurë dhe kishin tentuar t’i vinin flakën ndërtesës simbol të gjuhës shqipe, ngjarje që përkon me festën e Shkollës Shqipe dhe ditën e mësuesve që mes shqiptarëve festohet në 7 mars.
Rreth 160 shqiptarë nga e gjithë bota u mblodhën në nëntor të vitit 1908 në qytetin e Manastirit, në atë kohë, kryeqendër Vilajeti e Perandorisë Osmane, për të diskutuar mbi nevojën e krijimit të një alfabeti të unifikuar për gjuhën shqipe, e cila deri në atë kohë, shkruhej me një numër alfabetesh të ndryshme. Ata vendosën alfabetin e sotëm shqip të bazuar në shkronjat latine.
Qyteti i Manastirit që nga ajo kohë është transformuar dhe shqiptarët sot atje përbëjnë rreth 5 për qind të popullsisë totale.
Sulmi ndaj ndërtesës muze të Kongresit të Manastirit pason akuza të shumta të ngritura nga partia nacionaliste e ish-kryeministrit Nikola Gruevski kundër shqiptarëve si dhe nga presidenti i Maqedonisë Ivanov, i cili i përket partisë së Gruevskit dhe ka deklaruar së fundmi se shqiptarët po bëjnë një komplot kundër shtetit maqedonas.
Maqedonia gjendet aktualisht në krizë politike që prej një viti, kur ish-kryeministri Nikola Gruevski u detyrua të japë dorëheqjen pasi opozita zbuloi një skandal përgjimesh në shkallë të gjerë të kryer nga strukturat e policisë sekrete maqedonase, të cilat patën shërbyer më së shumti si ushtri private për ruajtjen e pushtetit të Gruevskit.
Ministria e Punëve të Jashtme të Shqipërisë, ndërsa i kërkoi qeverisë maqedonase të ndërpresin retorikën anti-shqiptare, i bëri gjithashtu thirrje shqiptarëve të vetëpërmbahen.
” I bëjmë thirrje shqiptarëve në Maqedoni që të mos bien pre e provokimeve por të tregojnë qytetari e maturi dhe të ruajnë besimin se kriza në vend do të zgjidhet në të mirë të të gjithë qytetarëve të Maqedonisë”, shkruhet në deklaratë.
