Emrat e Tërmet Peçit dhe Adriatik Zotkajt gjenden në listën e atyre që e plotësuan për herë të dytë formularin e dekriminalizimit, por Prokuroria thotë se do të marrë parasysh vetëm të dhënat e deklaruara brenda afatit ligjor.
Kryeprokurori Adriatik Llalla deklaroi të hënën se Prokuroria ka kërkuar heqjen e mandateve për dy kryebashkiakë të Partisë Socialiste në kuadër të zbatimit të ligjit të dekriminalizimit. Përmes një njoftimi për shtyp, Prokuroria e Përgjithshme sqaroi se kryebashkiaku i Tepelenës, Tërmet Peçi dhe ai i Poliçanit, Adriatik Zotkaj janë në kushtet e ndalimit të ushtrimit të funksionit, pasi nuk kanë deklaruar brenda afatit ligjor dënime të formës së prerë.
Sipas Prokurorisë, kryebashkiaku Peçi e ka dorëzuar formularin e tij të parë më 21 prill 2016 dhe nuk ka deklaruar në të një dënim të formës së prerë me 150 mijë lekë gjobë të vitit 2004 për veprën penale të “përdorimit të dokumenteve të falsifikuara”.
Ndërkohë, kryebashkiaku i Poliçanit, Adriatik Zotkaj ka deklaruar tre dënime gjyqësore në formularin e dorëzuar më 22 prill 2016 në Komisionin Qendror të Zgjedhjeve, por nuk ka reflektuar në të një dënim të vitit 1985.
Emrat e Tërmet Peçit dhe Adriatik Zotkajt ndodhen në listën e 12 zyrtarëve të cilët i kërkuan Komisionit Qendror të Zgjedhjeve të ndryshojnë apo të plotësojnë vetëdeklarimet e tyre për pastërtinë e figurës, duke argumentuar se nuk e kishin kuptuar ligjin.
Komisioni Qendror i Zgjedhjeve pranoi se u kishte dhënë atyre një mundësi të dytë për të korrigjuar të dhënat në formularin e vetëdeklarimit, duke u bazuar në kodin e procedurës administrative.
Prokuroria e Përgjithshme deklaroi të hënën se vetëdeklarimet e administruara nga Komisioni Qendror i Zgjedhjeve jashtë afateve ligjore nuk do të merren parasysh.
“…Sipas ligjit 138/2015 dhe vendimit 17/2016 të Kuvendit të Shqipërisë, ky formular është i vetmi formular që është plotësuar duke respektuar afatet ligjore. Çdo formular tjetër apo materiale të tjera, nuk mund t’i nënshtrohen verifikimit pasi bien në kundërshtim të hapur me ligjin,” thuhet në njoftimin e Prokurorisë së Përgjithshme.
Komisioni Qendror i Zgjedhjeve ka votuar heqjen e mandateve të deputetëve Shkëlqim Selami dhe Dashamir Tahiri si dhe të kryebashkiakut të Kavajës, Elvis Rroshi. Një kërkesë e Prokurorisë për heqjen e mandatit të deputetit të Lezhës, Armando Prenga nuk u shqyrtua nga KQZ, duke i dhënë atij mundësinë që të jepte dorëheqjen.
