Prokuroria e Tiranës ka mbyllur hetimet dhe ka dërguar në gjykatë ish-kreun e bordit të drejtorëve të CEZ Shpërndarje, Josef Hejsek dhe një anëtar të këtij bordi për marrëveshjen 4.5 milionë euro me Kastriot Ismailajn.
Prokuroria e Tiranës njoftoi të enjten se ka mbyllur hetimet dhe ka dorëzuar në gjykatë çështjen penale kundër ish-drejtorit të kompanisë CEZ Shpërndarje, Josef Hejsek dhe një anëtari të bordit të drejtorëve, të quajtur Jan Ivan. Përmes një njoftimi për shtyp, Prokuroria pranë Gjykatës së Shkallës së Parë Tiranë tha se dy ish-drejtuesit e CEZ akuzohen për veprën penale të “mashtrimit me pasoja të rënda”.
Çështja penale kundër dy ish-drejtuesve çekë të CEZ është e lidhur me procesin e Kastriot Ismailajt-pronari i kompanisë “Debt International Advisory”, DIA që po gjykohet gjithashtu në Gjykatën e Tiranës.
Sipas Prokurorisë së Tiranës, i pandehuri Kastriot Ismailaj ka bashkëpunuar me kryetarin e bodit të drejtorëve, Josef Hejsek dhe anëtarin e këtij bordi, Jan Ivan, që përmes të dhënave të rreme dhe dokumentave fiktive kanë “mundur të vjedhin 649 803 520 lekë nga shoqëria Cez Shpërndarje”.
“Kjo vlerë i është paguar shoqerisë “Debt Internacional Advisory” (DIA) Ltd- dega Shqipëri për punë apo shërbime të cilat nuk rezultojnë të jenë kryer,” thuhet në njoftimin për shtyp të Prokurorisë së Tiranës.
Kompania DIA e Kastriot Ismailajt dhe CEZ Shpërndarje lidhën një marrëveshje me 1 shtator 2010 për mbledhjen e borxhit të trashëguar nga operatori i shpërndarjes së energjisë, që sipas një investigimi të mëparshëm të BIRN arrinte në shumën e 230 milionë eurove.
Marrëveshja sipas Prokurorisë është firmosur nga Ismailaj, Hejsek dhe Ivan.
Prokuroria e Tiranës sqaron se kontrata e parë nuk u miratua nga Këshilli Mbikëqyrës i CEZ Shpërndarje dhe për këtë arsye, më datë 1 shkurt 2011, midis palëve u nënshkrua një marrëveshje e dytë me të njëjtin objekt për një afat 2-vjeçar.
“Nga tërësia e të dhënave të administruara gjatë hetimit të këtij procedimi penal arrihet në konkluzionin se qëllimi i vetëm i të pandehurit nuk ka qenë mbledhja e borxhit të kompanisë dhe as kryerja e ndonjë pune reale, por vjedhja e shoqërisë CEZ Shpërndarje sh.a,” thotë Prokuroria e Tiranës.
“Të pandehurit…krijuan një mekanizëm të tërë fiktiv që konsistonte në zvogëlimin e pasurisë së shoqërisë CEZ Shpërndarje, me qëllim kalimin e këtyre parave tek shoqëria DIA,” shton Prokuroria.
Pavarësisht manovrave që i sollën 4.5 milionë euro fitime, Kastriot Ismailaj iu drejtua gjykatës së arbitrazhit në Vjenë pas prishjes së kontratës, duke kërkuar 130 milionë euro nga OSSHE.
Dokumentet për llogari të këtij procesi në arbitrazh, të publikuara nga BIRN në investigime të mëparshme tregojnë se “përfitues të parave që DIA mori nga CEZ Shpërndarje ishin politikanë të rëndësishëm shqiptarë, përfshirë një ish-kryeministër të proceduar për korrupsion”.
Sipas një dëshmie që Hejsek dha për avokatët e palës shqiptare në arbitrazh, Ismailaj u trajtua si “kandidati” i qeverisë shqiptare për mbledhjen e borxheve të vjetra, pasi u prezantua si aleati i ngushtë i Metës dhe i ish-kryeministrit Berisha nga ambasadori shqiptar i asaj kohe në Pragë, Qazim Tepshi.
