Në përfundim të afatit të dytë për plotësimin dhe vlerësimin e aplikimeve, Avokati i Popullit deklaroi se lista e kandidatëve që plotësojnë kriteret për t’u bërë pjesë e institucioneve të vetingut shkoi në 84.
Avokati i Popullit njoftoi të premten se lista e kandidatëve që plotësojnë kriteret formale për institucionet e vetingut ka shkuar në 84, pas mundësisë së dytë që iu dha atyre për të plotësuar dokumentacionin ligjor. Përmes një deklarate për mediat, Avokati i Popullit, Igli Totozani tha se vlerësimi i dokumentacionit u realizua nën monitorimin e ekspertëve të Operacionit Ndërkombëtar të Monitorimit.
“Pas përfundimit të këtij procesi rezulton se numri i kandidatëve që kanë plotësuar kriteret formale ka shkuar në 84. Ndërsa 109 kandidatë aplikantë nuk i kanë përmbushur kriteret formale,” tha Totozani.
Totozani shtoi se të dy listat e kandidatëve i janë dorëzuar ONM-së, që në përputhje me ligjin duhet të skanojë sërish aplikantët që i kanë plotësuar kriteret formale dhe ata që nuk i kanë plotësuar ato.
Procedura e shqyrtimit të aplikimeve u përsërit, pasi Kuvendi i Shqipërisë vendosi që të zgjasë afatet për plotësimin e dokumentacionit për personat që kishin shprehur interes për të garuar për 27 postet e Komisionit të Pavarur të Kualifikimit, Kolegjit të Apelimit dhe Komisionerëve Publikë.
Në procedurën e parë, vetëm 21 kandidatë arritën të dorëzonin dokumentacionin e plotë ligjor dhe të kalonin filtrin e Operacionit Ndërkombëtar të Monitorimit.
Ligji për “rivlerësimin kalimtar të gjyqtarëve dhe prokurorëve…” i jep të drejtën ONM-së që të japë rekomandime negative ose pozitive për kandidatët, duke u bazuar në parimet e vetingut.
Më 3 mars 2017, kryetarja e bordit të ONM-së, Genoveva Ruiz Calavera shpjegoi përmes një letre për Avokatin e Popullit se 93 kandidatë nga të dyja listat ishin prekur nga rekomandimet negative. Megjithatë, zarfi i mbyllur me emrat e tyre mbeti i paprekur.
Kushtetura e Shqipërisë dhe ligji “i vetingut” përcaktojnë ngritjen e tre komisioneve parlamentare ad hoc me numër të barabartë anëtarësh nga mazhoranca dhe opozita për shqyrtimin e kandidaturave dhe përgatitjen e listës për votim.
Aplikantët mbërrijnë në komisionin e parë ad hoc në tre grupe; lista A me kandidatët që plotësojnë kriteret formale, lista B me kandidatët që nuk plotësojnë kriteret formale dhe e ashtuquajtura “lista e zezë”, e përbërë me emrat e atyre që kanë marrë rekomandime negative nga ONM.
Ndonëse procesi i vlerësimit të kandidatëve po shkon drejt fundit, procedura parlamentare është futur në ngërç për shkak të bojkotit të parlamentit nga opozita. Në këto kushte, ngritja e komisioneve parlamentare ad hoc dhe konstitutimi i institucioneve të vetingut duket e pamundur.