Mijëra vetë protestuan në qytete të ndryshme të Serbisë kundër asaj që e quajtën “diktaturë” të Aleksandër Vuçiç, presidentit të zgjedhur, i cili është aktualisht kryeministër.
Protesta anti-qeveritare, të organizuara nëpërmjet mediave sociale, u mbajtën të martën në mbrëmje në më shumë se 15 qytete në të gjithë Serbinë. Protestat më të mëdha u zhvilluan në Beograd, Novi Sad, Nish dhe Kragujevac, ku mijëra vetë morën pjesë.
Protestues, kryesisht të rinj, nga i gjithë vendi nuk kishin kërkesa të veçanta, por protestuan kundër “diktaturës” sipas tyre që do të sjellë presidenti i zgjedhur, Aleksandër Vuçiç, aktualisht kryeministër.
Demonstruesit protestuan gjithashtu kundër dyshimit se mediat shtetërore janë të kontrolluara dhe për parregullsitë gjatë zgjedhjeve presidenciale të mbajtura më 2 prill.
Ata refuzuan të pranojnë fitoren e zgjedhjeve presidenciale nga Vuçiç, pasi ky mori 55 për qind të votave, pothuajse 40 për qind më shumë se ish-avokati i popullit Sasha Jankoviç i cili u rendit i dyti në votime.
Protestuesit thirrën slogane si: “Vuçiç, hajdut!”, “Largohu” dhe “Ti vodhe votën”.
Më herët të martën, Vuçiç, i cili është lider i Partisë Progresive SNS, në pushtet, tha se njerëzit kanë të drejtë të protestojnë për aq kohë që nuk kalojnë në dhunë.
Të paktën 15.000 njerëz morën pjesë në tubim në Beograd, duke bllokuar trafikun në qytet. Protestuesit marshuan nga ndërtesa e parlamentit në radio-televizionin publik serb dhe në ndërtesën e qeverisë, ndërsa i frynin bilbilave dhe i binin daulleve. Protestuesit i vunë flakën një dordoleci dhe e vunë atë në hyrje të ndërtesës qeveritare e më pas i gjuajtën me vezë.
Aleksandar Balan tha për BIRN se doli të protestojë kundër “vjedhjes qartazi të zgjedhjeve, që i bëri votat të padobishme”.
“Janë regjistruar shtatë milion njerëz për të votuar por popullsia e Serbisë është pak më shumë se gjashtë milionë. Të gjithë e dinë se kush i merr votat e njerëzve jo-ekzistues”, tha Balan, i cili është i papunë.
Gjimnazistja Katarina Kovrlija tha se nuk e dinte nëse protestat do të ndryshonin gjë, por se “rëndësi ka që ata të përpiqen”.
“Fituesi i zgjedhjeve ishte blerja e votave, njerëzit i shitën votat e tyre për sanduiçë dhe një mijë dinarë. Media shfaqi vetëm Aleksandër Vuçiçin”, tha ajo.
Nuk është e qartë se kush ishin organizatorët e protestës së Beogradit. Tubimi bashkoi aktivistët liberalë, grupet e krahut të djathtë, qytetarët, studentët dhe mbështetësit e partive opozitare serbe. Askush nuk mbante simbol partiak.
Në qytetin verior të Novi Sadit, rreth 2000 persona dolën në rrugë në një protestë të organizuar nga Lëvizja Studentore.
“Nuk jemi të kënaqur me situatën post-zgjedhore. Ne duam ta rrëzojmë Vuçiçin dhe Partinë e tij Progresive Serbe dhe partitë që bashkëpunojnë me ta,” tha Katarina Antoniç nga Lëvizja e Studentëve për BIRN.
Ajo shtoi se organizata e tyre nuk ishte e lidhur me ata që organizuan protestat në Beograd, por se do të koordinohen në të ardhmen.
Në qytetin jugor serb Nish, rreth 5000 të rinj u organizuan nga media sociale dhe dolën në rrugë për të kërkuar ndryshim. Megjithatë, protestuan edhe pensionistë të cilët tanë se nuk duan që fëmijët dhe nipërit e mbesat e tyre të largohen nga vendi për punë.
Protesta më të vogla u organizuan edhe në qytete të tjera të Serbisë. Vendi përgatitet për t’i përshkallëzuar ato në ditët në vazhdim.