Një gjykatë franceze shtyu për herë të tretë vendimin e saj mbi ekstradimin ose jo në Serbi të ish-kryeministrit të Kosovës Ramush Haradinaj, ku ai kërkohet nën akuzat për krime lufte.
Gjykata e Apelit në qytetin Colmar në Francë të enjten shtyu për herë të tretë vendimin e saj për kërkesën e Serbisë për ekstradimin e ish-kryeministrit dhe ish-luftëtarit të Ushtrisë Çlirimtare të Kosovës Ramush Haradinaj, duke lajmëruar një seancë të re më 27 prill.
Haradinaj tha përsëri në gjykatë se ai ishte i pafajshëm dhe se akuzat e Serbisë ishin politike.
“Ata kryen vrasje, krime në Kosovë dhe më akuzojnë mua,” tha Haradinaj, raportoi gazeta në internet e Kosovës Indeksonline.
I rrethuar nga shqiptarë që u mblodhën para gjykatës në Colmar për të treguar mbështetje, Haradinaj tha për mediat se pritej që vendimi do të shtyhej.
“Do të presim edhe pak deri më 27 prill. Ne kemi të drejtë dhe e drejta do të fitojë,” tha ai për mediat.
“Është konfirmuar se unë jam i pastër, e vërteta u konfirmua në vitin 2012. Nuk e njoh juridiksionin e Serbisë,” shtoi ai.
Haradinaj është liruar dy herë nga akuzat nga Gjykatën e Hagës për krime lufte të kryera gjatë konfliktit të viteve 1998-1999 në Kosovë, më i fundit në vitin 2012.
Megjithatë, zyrtarët serbë këmbëngulin se ata kanë prova se Haradinaj ishte i përfshirë në krime të tjera lufte për të cilat ai s’është gjykuar ende.
Ata thonë se ai dyshohet për vrasje të civilëve, përfshirë vrasjen e një fëmije dy javësh, torturimin dhe përdhunimin e një të mituri.
Arrestimi i tij në një aeroport francez pasi ai u nis nga Kosova në fillim të këtij viti rriti tensionet midis Beogradit dhe Prishtinës.
Kjo shkaktoi gjithashtu protesta nga shqiptarët brenda dhe jashtë Kosovës, të cilët bëjnë thirrje për lirimin dhe e dënojnë arrestimin e tij si një akt politik.
Gjykata franceze e liroi Haradinajn me kusht më 12 janar, por e urdhëroi atë të qëndrojë në Francë nën mbikëqyrje gjyqësore ndërsa autoritetet shqyrtojnë nëse duhet ta dërgojnë apo jo atë në Serbi që të përballet me akuzat për krime lufte.