Operacioni Ndërkombëtar i Monitorimit i dorëzoi Avokatit të Popullit rekomandimet për aplikantët dhe i bëri thirrje Kuvendit që të fillojë pa vonesë procesin e emërimit të anëtarëve të institucioneve të vetingut.
Operacioni Ndërkombëtar i Monitorimit ka kualifikuar 67 kandidatë të vlefshëm për institucionet e vetingut, pas procesit të dytë të vlerësimit të aplikimeve. Përmes një njoftimi për shtyp, ONM deklaroi se ka përfunduar rishikimin e aplikimeve dhe i ka dorëzuar Avokatit të Popullit rekomandimet e reja mbi kandidatët.
Sipas ONM, nga 84 aplikantët e listës që plotësojnë kriteret formale, 17 janë vlerësuar me rekomandim negativ.
Ndërsa nga 109 aplikantët e listës që nuk i plotësojnë kriteret formale, 70 janë vlerësuar me rekomandim negativ, 39 nuk janë vlerësuar me rekomandim negativ por ekspertët ndërkombëtarë pajtohen me anëtarët e komisionit të vlerësimit të zyrës së Avokatit të Popullit që këta kandidatë nuk plotësojnë kriteret formale.
Rekomandimet e dorëzuara të premten te Avokati i Popullit zëvendësojnë rekomandimet e parë të 3 marsit të ONM, pasi Kuvendi i Shqipërisë vendosi t’u japë një mundësi të dytë aplikantëve për të dorëzuar dokumentet e munguara.
Për këtë proces u angazhua ekipi i vëzhguesve ndërkombëtarë të ONM, me anëtarë të nivelit të lartë nga gjyqësori i vendeve të BE dhe Shteteve të Bashkuara të Amerikës.
Pas dorëzimit të zarfit të mbyllur me rekomandime, Operacioni Ndërkombëtar i Monitorimit i bëri thirrje Kuvendit të Shqipërisë që të fillojë pa vonesa procesin e emërimeve të anëtarëve të institucioneve të vetingut.
Përmes një postimi në Twitter, kryetarja e ONM, Genoveva Ruiz Calavera shkroi se” një sistem gjyqësor i besueshëm është i rëndësishëm për qytetarët dhe të ardhmen e Shqipërisë në Bashkimin Europian”.
Kushtetura e Shqipërisë dhe ligji “i vetingut” përcaktojnë ngritjen e tre komisioneve parlamentare ad hoc me numër të barabartë anëtarësh nga mazhoranca dhe opozita për shqyrtimin e kandidaturave dhe përgatitjen e listës për votim.
Aplikantët mbërrijnë në komisionin e parë ad hoc në tre grupe; lista A me kandidatët që plotësojnë kriteret formale, lista B me kandidatët që nuk plotësojnë kriteret formale dhe e ashtuquajtura “lista e zezë”, e përbërë me emrat e atyre që kanë marrë rekomandime negative nga ONM.
