Afati i përcaktuar nga Kushtetuta për ngritjen e KLGJ dhe KLP skadon më 11 prill, por procedurat për zgjedhjen e anëtarëve nga avokatia, nga radhët e pedagogëve dhe shoqëria civile janë ende larg fundit.
Kushtetuta e Shqipërisë parashikon një afat 8-mujor për ngritjen e Këshillit të Lartë Gjyqësor dhe Këshillit të Lartë të Prokurorisë-afat i cili skadon më 11 prill. Megjithatë, puna për konstituimin e dy institucioneve kyçe të sistemit të ri të drejtësisë është ende larg përfundimit.
Këshilli i Lartë Gjyqësor dhe Këshilli i Lartë i Prokurorisë do të kenë secili nga 11 anëtarë-6 prej të cilëve do të zgjidhen nga radhët e gjyqtarëve dhe prokurorëve, ndërsa pesë të tjerët do të ndahen mes përfaqësuesve nga avokatia për dy poste, nga radhët e pedagogëve për dy poste dhe shoqëria civile, 1 post.
Avokati i Popullit njoftoi të hënën se komisioni ad-hoc, i ngritur me vështirësi pranë këtij institucioni ka përfunduar fazën e parë të vlerësimit paraprak të kandidaturave nga avokatia për Këshillin e Lartë Gjyqësor dhe Këshillin e Lartë të Prokurorisë.
Sipas njoftimit, 10 kandidatë nga 18 aplikime gjithsej i kanë plotësuar kriteret formale për të vazhduar garën për dy pozicione në Këshillin e Lartë Gjyqësor, KLGJ.
Ndërkohë, për Këshillin e Lartë të Prokurorisë, kriteret formale i kanë plotësuar vetëm 5 kandidatë nga 14 aplikime gjithsej. Edhe në KLP, avokatët do të zënë dy vende.
Ligji për “organet e qeverisjes së sistemit të Drejtësisë” i jep të drejtën komisionit ad-hoc të kryesuar nga Avokati i Popullit që të bëjë vlerësimin e kritereve formale ligjore, por edhe të vlerësimit të integritetit moral dhe profesional për aplikantët nga avokatia për KLGJ dhe KLP.
Sipas nenit 35 të ligjit për “organet e qeverisjes së sistemit të Drejtësisë”, Avokati i Popullit i përcjell Sekretarit të Përgjithshëm të Kuvendit listën me emrat e kandidatëve që kanë marrë pikët më të larta, “por jo më shumë se 10 kandidatë dhe në çdo rast, jo më pak se trefishi i numrit të vendeve vakante”.
Në kohën që kandidatët e kualifikuar për KLP janë vetëm pesë-më pak se trefishi i numrit të vendeve vakante, kjo procedurë pritet të shkojë drejt rihapjes së aplikimeve.
I kontaktuar nga BIRN, institucioni i Avokatit të Popullit pohoi se kandidatët për KLP janë të pamjaftueshëm dhe se “do t’i kërkohej Sekretarit të Përgjithshëm të Kuvendit të rihapte procedurën e aplikimeve”.
Numri i ulët i kandidatëve të kualifikuar nuk shoqëron vetëm zgjedhjen e anëtarëve të KLP-së nga avokatia. Më 17 mars, Avokati i Popullit rishpalli thirrjen e interesit për kandidatët nga shoqëria civile, ndërkohë që një fat të ngjashëm pritet të ketë edhe procedura për zgjedhjen e anëtarëve nga bota akademike.
