Dy deputetë të PS dhe një deputet i LSI do të përfaqësojnë mazhorancën në komisionin e parë ad-hoc, ndërkohë që PDIU kundërshton rrëzimin e kandidaturës së Idrizit.
Mazhoranca votoi tre anëtarët e komisionit ad-hoc për verifikimin e kandidatëve të vetingut në një seancë të shkurtër dhe të tensionuar, e cila u bojkotua siç ishte paralajmëruar nga opozita.
Vasilika Hysi dhe Ulsi Manja, deputetë të Partisë Socialiste dhe Luan Rama i Lëvizjes Socialiste për Integrim morën votat për të përfaqësuar mazhorancën në komisionin e parë ad-hoc për zbatimin e ligjit të vetingut.
Ndërkohë, propozimi i Partisë për Drejtësi, Integrim dhe Unitet, PDIU për t’u përfaqësuar në këtë komision nga Shpëtim Idrizi nuk mori votat e nevojshme nga deputetët e pranishëm në sallë.
Deputetja Mesila Doda e PDIU akuzoi Partinë Socialiste për rrëzimin e kandidaturës së Idrizit.
“Në kundërshtim me kërkesën e kryetarit të Kuvendit që secili grup parlamentar të përfaqësohej nga një anëtar, Partia Socialiste paraqiti dy kandidatuta. Pasi u shkatërrua konsensusi me opozitën, por shkatërrohet procesi edhe brenda mazhorancës,” tha Doda.
Pakënaqësia e shprehur nga PDIU në seancën e jashtëzakonshme reflekton tensionin mes tre partive të mazhorancës, të cilat kanë shprehur qëndrime të ndryshme për kërkesat e opozitës në protestë dhe zgjedhjet parlamentare të 18 qershorit.
Ndërkohë, votimi i së martës nuk i hap rrugën funksionimit të komisionit ad-hoc, pasi Kushtetuta e Shqipërisë dhe ligji për “rivlerësimin kalimtar të gjyqtarëve dhe prokurorëve” i jep opozitës të drejtën që të përfaqësohet me një numër të barabartë anëtarësh në këtë komision.
Kryeministri Edi Rama e quajti procesin e votimit si “nisjen e zbatimit të ligjit të vetingut”.
“Mund ta vonojnë, por as vetingun as Shqipërinë nuk e ndalojnë dot,” shkroi ai në një postim në Facebook.
Më 7 prill, Operacioni Ndërkombëtar i Monitorimit përfundoi procesin e vlerësimit të kandidatëve për institucionet e vetingut, ndërsa në Kuvend janë depozituar lista e kandidatëve që i plotësojnë kriteret formale, lista e kandidatëve që nuk i plotësojnë kriteret formale dhe rekomandimet e ONM.
Sipas ONM, 67 kandidatë janë të përshtatshëm për t’u zgjedhur në postet vakante të Komisionit të Pavarur të Kualifikimit, Kolegjit të Apelimit dhe Komisionerëve Publikë.