Kryeministri Edi Rama e quajti strategjinë e deritanishme të Partisë Demokratike “një bllof me pasoja të rënda”, ndërsa deklaroi se i ka ofruar Lulzim Bashës një mekanizëm real për monitorimin e zgjedhjeve-të cilin e quajti “zgjidhjen e fundit në tavolinë”.
Kryeministri Edi Rama u shfaq triumfator i konfliktit politik të tre muajve të fundit, duke e shpjeguar dështimin e negociatave me Partinë Demokratike me metaforën e lojës së shahut.
“Partia Demokratike luajti bllofin dhe bllofi ka pasoja të rënda për Partinë Demokratike, por kjo nuk është çështja ime,” tha Rama gjatë një konference për shtyp të enjten.
Sipas kryeministrit, i vetmi shans në strategjinë e PD-së ishe mundësia për të destabilizuar koalicionin qeverisës dhe për të mikluar Ilir Metën-të cilin ai e quajti “Presidenti më komod për PD-në”.
Me pohimin se strategjia e Partisë Demokratike rezultoi sipas tij humbëse, Rama deklaroi se propozimi i javës së shkuar, i arritur me ndërmjetësimin e europarlamentarëve David McAllister dhe Knut Fleckeinstain nuk ishte më mbi tavolinë.
“Ne nuk mund të lejojmë shtyrje zgjedhjesh përtej qershorit,” theksoi Rama, duke shtuar më pas se 68 për qind e shqiptarëve nuk duan shtyrje të zgjedhjeve. “Saliu është shahist i vjetër dhe e di mirë që kur përdor metodën e pokerit në shah, duhet të marrësh parasysh pasojat e luajtjes së bllofit”, tha ai, duke iu referuar ish-kryeministrit Sali Berisha.
Kryeministri Rama tha se në takimin e së mërkurës me kryetarin e PD-së, Lulzim Basha në zyrën e Presidentit të Republikës i kishte ofruar këtij të fundit “një mekanizëm realist dhe garantist” për të vëzhguar nga afër dhe në kohë reale procesin zgjedhor. Ai e quajti këtë propozim, “një mekanizëm që as e kishte parë në ëndërr kur ishte në opozitë”.
Paketa e ofruar nga Rama përfshin ngritjen e një task-force me në krye një zv.kryeministër teknik të propozuar nga Partia Demokratike dhe të asistuar nga përfaqësues të Bashkimit Europian, Shteteve të Bashkuara dhe OSBE-së për të monitoruar sjelljen e administratës dhe strukturave shtetërore gjatë fushatës elektorale. Pjesë e ofertës është gjithashtu një zëvendës ministër i Brendshëm, i propozuar gjithashtu nga Partia Demokratike, që së bashku me përfaqësues të BE, SHBA dhe OSBE do të kenë mundësinë të realizojnë monitorimin e sjelljes së policisë në zgjedhje.
Për kërkesën e votimit elektronik, Rama u shpreh i hapur për ta financuar, por vetëm për zgjedhjet lokale të 2019-s.
Kryeministri pranoi gjatë konferencës për shtyp avantazhet që mazhoranca ka në raport me opozitën, të cilat lidhen me përdorimin e infrastrukturës zgjedhore, pjesmarrjen e nxënësve apo mësuesve në aktivitete politike, ndërsa shtoi se “nuk e kishte mohuar asnjëherë që kanabisi ishte një problem”. Ai shtoi se përmes propozimit të tij, opozita do të kishte mundësinë që të monitoronte të gjitha këto anomali.
Rama paralajmëroi Partinë Demokratike se kjo ishte “zgjidhja e fundit” e propozuar prej tij, ndërsa ftoi Bashën që ta pranonte atë.
“Nuk ka asnjë zgjidhje tjetër, propozimi është mbi tavolinë. Përmbush nevojën e PD-së që të ketë jo një, por të dy sytë në vëzhgimin e procesit zgjedhor,” përfundoi ai.