Pas 30 qershorit 2017, banorët e zonave të Durrësit dhe Tiranës nuk do të mund të përfitojnë nga sistemi analog i transmetimit televiziv nëse ata nuk janë pajisur me dekodera dixhital, lajmëroi të hënën AMA.
Përmes një njoftimi për shtyp Autoriteti i Mediave Audiovizive, AMA, lajmëroi të hënën se televizorët e banorëve të zonës së Durrësit dhe Tiranës do të mbeten pa sinjal në rast se ata nuk janë pajisur me dekodera dixhital, pasi transmentimi analog në këto qytete nuk është më i vlefshëm.
“AMA… si institucioni që mban rol themelor në procesin e kalimit në transmetimet numerike, njofton se data përfundimtare e mbylljes së transmetimeve analoge në qarqet Tiranë e Durrës është data 30 qershor 2017,” lajmëroi autoriteti.
Autoriteti i Mediave Audiovizive i bëri gjithashtu thirrje teleshikuesve që përdorin teknologjinë analoge, të pajisen me marrës dixhital (dekoderë të tipit DVB-T2) , për të vazhduar ndjekjen e programeve televizive, për shkak se pas 30 qershorit kjo nuk do të jetë më e mundur pa dixhitalizim.
Transmetimi në sistemin analog e ka përballur vendin me disa ankesa të vendeve fqinje si Italia dhe Mali i Zi, për shkak të interferencave që operatorët shqiptarë u shkaktojnë rrjeteve të tyre.
Duke iu drejtuar subjekteve audiovizive që ushtrojnë veprimtari televizive analoge, AMA i nxiti ata ” të marrin masat për të mbështetur programin e tyre në rrjetin numerik të RTSH ose në njërin prej rrjeteve numerike kombëtare të licencuara nga AMA”.
Shqipëria është një ndër vendet e pakta në Europë që ka dështuar të përmbyllë procesin e dixhitalizimit brenda afatit 17 qershor 2015, përcaktuar nga Bashkimi Ndërkombëtar i Telekomunikacioneve.
I nisur prej qershorit 2012 si një kusht i Bashkimit Europian, procesi i dixhitalizimit në Shqipëri është shoqëruar me zvarritje të shumta, akuza për favorizime dhe procese të vazhdueshme gjyqësore. Përgjatë kësaj kohe, AMA çeli dy herë procedurën për shpërndarjen e pesë licensave numerike kombëtare, por dështoi t’i përmbyllte ato.
Në mars 2016, Gjykata Administrative e Tiranës vendosi t’u japë tre prej licensave subjekteve “Top Channel”, “TV Klan” dhe “Digit-Alb”. Më pas, AMA i dha licencën e katërt operatorit Vizion Plus dhe më 27 janar 2017 shpërndau edhe licencën e fundit për kompaninë ADTN, e cila zotërohet gjithashtu 100 % nga Digit-Alb.
Më 13 mars 2017 ministria e Financave dhe ministria e Shtetit për Inovacionin dhe Administratën Publike, dorëzuan në Kuvend një projektligj ku propozohet kompensimi i pjesshëm i kostove shtesë për investimet në teknologji që shoqëruan kalimin nga transmetimet analoge në ato numerike, një faturë që e kalon 5 milionë euro.
