Slogane fashiste u brohoritën në një koncert nga këngëtari nacionalist kroat Marko Perkoviç “Thompson” në qytetin boshnjak të Mostarit në mbështetje të ish-zyrtarëve kroatë të Bosnjës që po gjykohen për krime lufte.
Rreth 8,000 njerëz brohoritën përshëndetjen fashiste kroate të Luftës së Dytë Botërore “Za dom spremni” në koncertin e Thompson të enjten në mbrëmje të stadiumin e futbollit Zrinjskit në qytetin jugor boshnjak të Mostarit.
Në një qytet të ndarë gjerësisht midis kroatëve dhe boshnjakëve, koncerti u organizua në mbështetje të gjashtë gjeneralëve dhe politikanëve kroatë të Bosnjës, liderë të shtetit të panjohur të Republikës Kroate të Herceg-Bosnjës, të cilët po presin vendimin e tyre përfundimtar para Gjykatës Penale Ndërkombëtare për Ish-Jugosllavinë, ICTY, për krime lufte kundër boshnjakëve midis viteve 1992 dhe 1994.
Në vitin 2013, ICTY i dënoi ata me një total prek 111 vitesh burg, por tani po shqyrtohet një apel kundër dënimeve të tyre nga ana e gjykatësve të gjykatës se OKB-së.
Koncerti tërhoqi kryesisht të rinj midis moshës 15 dhe 25 vjeç nga e gjithë Bosnja dhe Hercegovina, si dhe Kroacia fqinje.
Prezantuesi i koncertit tha se ai po mbahej në mbështetje të kroatëve të pafajshëm që po mbahen në burg “dhe të gjithë anëtarët të pafajshëm të burgosur të HVO-së” – Këshilli Kroat te Mbrojtjes,, forcat e armatosura të Herceg-Bosnjës.
Gjashtë karrige bosh me emrat e gjashtë zyrtarëve të Herceg-Bosnjës – Jadranko Prliç, Bruno Stojiç, Slobodan Praljak, Milivoje Petkoviç, Valentin Coriç dhe Berislav Pusiç – u vendosën përpara skenës.
Koncerti u hap nga një vajzë që këndoi himnin kombëtar të Kroacisë, ndërsa disa grupe të ndryshme muzikore dhe këngëtarë luajtën këngë popullore dhe patriotike, disa prej të cilëve i këndoheshin Herceg-Bosnjës.
Ylli më i madh i koncertit ishte këngëtari nacionalist kroat Thompson, i cili mbylli koncertin.
Pavarësisht se nuk këndoi një nga këngët e tij më polemike, këngën “Cavoglave”, e cila përdor përshëndetjen ustashe “Za dom spremni”, turma e njerëzve filloi ta brohoriste atë në disa raste.
“Me këtë koncert, ne po i japim zë bukurisë dhe dashurisë. Duam që ky koncert të inkurajojë të burgosurit tanë, të inkurajojë mbrojtësit tanë (veteranët e luftës së viteve 1990) dhe miqtë tuaj të dashur, njerëzit tanë që jetojnë në Hercegovinë, Kroaci, Bosnjë… Ky është mesazhi i këtij koncerti – dashuria,” brohoriti Thompson, që më pas të duartrokitej nga turma.
“Uroj që mbrojtësit tanë kroatë që janë gjykuar padrejtësisht ta ndiejnë forcën e dashurisë së kësaj mbrëmjeje,” shtoi ai.
Thompson dhe performues të tjerë e mbyllën koncertin me këngën patriotike dhe të njohur të këngëtarit kroat “Lijepa si li” (Ti je e bukur), e cila lavdëron Herceg Bosnjën.
Organizatorët e koncertit – Asambleja Kombëtare Kroate, e cila përfshin partitë kroate të Bosnjës dhe Shoqatën e Zemrës Kroate të Shpresës, një OJQ që promovon kroatët në Bosnjë – nuk e lejoi median të komunikonte me turmën në radhët e para. Media nuk u lejua gjithashtu të dilte nga vendi i rezervuar për ata para skenës.
Ndërsa disa fishekzjarrë u ndezën në koncert, policia e qarkut raportoi se në koncert nuk pati incidente – pa përmendur brohoritjet “Za dom spremni”. Disa pjesëmarrës në koncert kishin veshur bluza të Këshillit Kroat të Mbrojtjes të viteve 1990, HOS, me “Za dom spremni” të shkruar në stemën e tyre të armëve – një logo e njohur zyrtarisht nga shteti kroat.
Disa OJQ dhe parti politike boshnjake kishin kërkuar që koncerti i Thompson të ndalohej – pasi koncertet e tij janë ndaluar në të gjithë Europën – për shkak të lidhjeve të tij me regjimin ustash dhe se lavdëron Herceg-Bosnjën, por kjo u refuzua nga autoritetet e Mostarit.
Në vitin 2009, performanca e Thompsonit e këngës që lavdëron ustashët “Jasenovac dhe Gradiska Stara” – emrat e kampeve të përqendrimit të ustashëve – shkaktoi zemërim në Kroaci dhe në të gjithë rajonin.
