Drejtori i Policisë së Shtetit Haki Çako, njoftoi të dielën arrestimin e 24-vjeçarit Mikel Shallari, si i dyshuar për vrasjen e ish oficerit të lartë të policisë Artan Cuku.
Në një konferencë të përbashkët me prokurorin e Krimeve të Rënda Enrik Ligori, Drejtori i Policise Haki Çako u shpreh se arrestimi i 24 vjeçarit Shallari ishte bërë në bashkëpunim të ngushtë me partnerët ndërkombëtarë.
“Provat e administruara deri në këto momente janë të konsiderueshme, bazuar në kodin e Procedurës Penale vazhdojmë punën për dokumentimin e plotë edhe të bashkautorëve, por edhe sqarimin e motiveve të kësaj ngjarjeje,” u shpreh Çako, duke nënvizuar se roli 24 vjeçarit nga Kuçova në këtë ngjarje të rëndë kriminale ishte ai i ‘ekzekutorit.’
“Ka edhe persona të tjerë të shpallur “në kërkim”, të cilët janë bashkautorë, roli i të cilëve do të përcaktohet gjatë hetimit me kalimin e kohës,” Cako shtoi.
Ndërkohë Prokurori Enrik Ligori nënvizoi që Shallari ishte informuar mbi provat e mbledhura nga organi i akuzës por vazhdon të mohojë përfshirjen e tij në këtë krim.
“Unë kam pasur dy komunikime me të, ai vazhdon të këmbëngulë, të mohojë përfshirjen e tij në këtë krim, si ekzekutor material i tij,” u shpreh Ligori.
“Në ndalimin e këtij personi, ky i fundit është marrë në pyetje, i janë ofruar të gjitha indiciet dhe provat që e ngarkojnë atë me përgjegjësi, të cilat duhet të themi që janë të rëndësishme, janë të sakta, dhe të gjitha na çojnë drejt faktit që ai është ekzekutori material i krimit, për këtë nuk ka dyshime,” shtoi ai.
Ish oficeri i lartë i policisë, komisar Artan Cuku i vra në mbremjen e 8 prillit në Tiranë në hryje të banesës së tij në rrugën e “Kosovarëve.”
Gjatë konferencës për shtyp prokurori Enrik Ligori u shpreh i sigurtë që i dyshuari Shallari ishte ekzekutuesi material i krimit por u rezervua të shprehej nëse ai ishte dhe ideatori i vrasjes.
“Ne aktualisht dimë që dora që ka tërhequr këmbzën, është e Mikel Shallarit. A është njëkohësisht edhe ideatori i këtij krimi? Këtë nuk mund ta themi dot,” tha Ligori, duke shuar se të dyshuarit “i janë ofruar të gjitha lehtësitë që parashikon ligji në rastin e bashkëpunimit me drejtësinë.”