Unioni i Gazetarëve Shqiptarë i kërkon gjyqtarit Gjin Gjoni që para se të përballet me gazetarët dhe mediat në gjykatë, të zhvishet nga mundësia e ndikimit mbi gjykatësit që do të shqyrtojnë çështjet.
Unioni i Gazetarëve Shqiptarë, UGSH i ka bërë thirrje gjyqtarit Gjin Gjoni që të japë dorëheqjen nga funksionet e larta drejtuese që mban, para se të përballet në gjyq me gazetarët dhe mediat e paditura prej tij me pretendimin e cenimit të imazhit. Përmes një deklarate për shtyp, Unioni i Gazetarëve Shqiptarë i ka kërkuar gjyqtarit të Apelit, i cili mban njëherazi edhe postin e anëtarit të Këshillit të Lartë të Drejtësisë që të “zhvishet nga mundësia e ndikimit mbi gjykatësit që do të gjykojnë [paditë]”.
“Unioni i Gazetarëve Shqiptarë është i informuar rreth mësymjes gjyqësore që anëtari i Këshillit të Lartë të Drejtësisë, zoti Gjin Gjoni ka hapur ndaj disa gazetarëve dhe mediave respektive ku punojnë, në pretendime juridike për cenim të imazhit të tij si dhe disa argumentave të pretenduara juridike,” thuhet në deklaratën për shtyp të UGSH.
“UGSH e konsideron këtë proces të emrit të përfolur prej kohësh në mediumet e vendit, si një përpjekje të dështuar qysh në nisje të proceseve të hapura prej tij,” shtohet më tej.
Me pretendimin se raportimet mbi hetimet penale dhe vendimet gjyqësore përkatëse mbi pasurinë e tij familjare i kanë shkaktuar cënim të imazhit, dëm jomaterial dhe dhimbje e vuajtje shpirtërore, gjyqtari Gjin Gjoni dhe bashkëshortja e tij Elona Çaushi ngritën një padi ndaj Rrjetit Ballkanik të Gazetarisë Investigative në Shqipëri, BIRN Albania si dhe ndaj gazetarëve Besar Likmeta e Aleksandra Bogdani. Ai ka ngritur gjithashtu padi të ngjashme ndaj të përditshmes Shqiptarja.com dhe gazetarëve të saj, Elton Qyno dhe Adriatik Doçi.
Gjyqtari Gjoni dhe bashkëshortja e tij Çaushi kërkojnë në total 11 milionë lekë dëmshpërblim nga mediat dhe gazetarët.
Në deklaratën e saj, UGSH mbështet gazetarët në këtë përballje me “një ndër eksponentët më të lartë të sistemit aktual të drejtësisë” dhe kërkon vendosjen e parimit të barazisë mes gjyqtarit Gjoni dhe gazetarëve.
“ UGSH duke mbetur në pritje të seancave dhe gjykimeve të pritshme, pa nisur ende ato, në emër të parimit të mos dikimit për shkak të pozitës dhe për të evituar çdo nuancë intimidimi prej zotit Gjin Gjoni, i kërkon atij dorëheqjen nga funksionet e larta drejtuese , duke e konsideruar këtë një mundësi të barazisë së tij me gazetarët si palë e akuzuar, në raport me proceset gjyqësore që ai ka hapur,”përfundon deklarata e UGSH.
