Në seancën e parë të çështjes gjyqësore në të cilën Gjyqtari Gjin Gjoni dhe bashkëshortja e tij Elona Çaushi pretendojnë se u është cenuar nderi dhe reputacioni nga Shqiptarja.com dhe gazetarët Elton Qyno e Adriatik Doçi, gjyqtarja Blerina Muça deklaroi se do të kërkonte emërimin e një gjykatësi nga jashtë rrethit gjyqësor për këtë çështje.
Seanca e parë e çështjes së ngritur nga gjyqtari Gjin Gjoni kundër gazetës Shqiptarja.com dhe dy gazetarëve të saj për shkaktim dëmi jopasuror u mbyll të enjten brenda pak minutash me deklaratën e gjyqtares Blerina Muça për palët se ajo nuk mund ta gjykonte këtë çështje për shkak të konfliktit të mundshëm të interesit. Gjyqtarja deklaroi se do t’i kërkojë kryetarit të Gjykatës së Rrethit Gjyqësor Tiranë që t’i drejtohet Këshillit të Lartë të Drejtësisë për emërimin e një gjyqtari jashtë rrethit gjyqësor të Tiranës për të gjykuar këtë çështje.
Gjyqtarja tha se për shkak se njëri nga paditësit, Gjin Gjoni, është gjyqtar në Gjykatën e Apelit Tiranë dhe ish-gjyqtar i Gjykatës së Tiranës e ish-koleg i gjyqtares, ajo nuk mund të gjykonte çështjen.
Tani pritet që kërkesa e gjyqtares Blerina Muça t’i kalojë kryetarit të Gjykatës ndërsa ky i fundit duhet t’i drejtohet Këshillit të Lartë të Drejtësisë me kërkesën për të emëruar një gjyqtar pa konflikt interesi me palën paditëse, një procedurë që nuk dihet se sa do të zgjasë dhe për këtë arsye, gjyqtarja refuzoi të caktojë një datë për seancën pasardhëse.
Këshilli i Lartë i Drejtësisë është institucioni që ka autoritetin të delegojë një gjyqtar nga një gjykatë tjetër. Një prej paditësve, Gjin Gjoni, është anëtar i Këshillit të Lartë të Drejtësisë që nga viti 2013.
Gazeta Shqiptarja.com dhe gazetarët Elton Qyno e Adriatik Doçi janë thirrur nga paditësit Gjoni e Çaushi me pretendimin se raportimet e tyre mbi pasurinë e familjes në fjalë dhe mbi hetimet e vendimet gjyqësore mbi këtë pasuri nën dyshimet për pastrim parash e falsifikim, përbëjnë cenim të nderit dhe personalitetit.
Gjoni dhe Çaushi pretendojnë se kanë pësuar dëm jopasuror nga këto raportime dhe kërkojnë dëmshpërblim në masën 2 milionë lekë nga gazeta dhe nga 1 milionë nga secili prej gazetarëve.
Në një çështje të veçantë, Gjoni dhe Çaushi kanë ngritur padi edhe ndaj Rrjetit Ballkanik të Gazetarisë Investigative, BIRN Albania dhe gazetarëve Besar Likmeta e Aleksandra Bogdani me pretendimet se raportimet i kanë shkaktuar vuajtje shpirtërore. Gjoni dhe Çaushi kërkojnë dëmshpërblim për dëm jopasuror në masën 5 milionë lekë nga BIRN dhe nga 1 milionë lekë nga secili prej gazetarët.
Në një shkrim të mëparshëm, BIRN deklaroi se i qëndron shkrimeve të publikuara dhe se është e gatshme të përballet në gjykatë me të gjitha pretendimet, duke e konsideruar padinë civile të ngritur nga gjyqtari si të pabazë.
Seanca e parë e çështjes ndaj BIRN dhe gazetarëve Likmeta e Bogdani është përcaktuar më 5 korrik.
Pretendimet e Gjonit dhe Çaushit kanë shkaktuar reagime. Unioni i Gazetarëve Shqiptarë deklaroi se Gjoni duhet të japë dorëheqjen nga pozicioni i tij si gjyqtar dhe Anëtar i Këshillit të Lartë të Drejtësisë para se të përballet në gjykatë me gazetarët.
“UGSH, dukë mbetur në pritje të seancave dhe gjykimeve te pritshme, pa nisur ende ato, në emër të parimit të mos ndikimit për shkak të pozitës dhe për të evituar çdo nuancë intimidimi prej zotit Gjin Gjoni, i kërkon atij dorëheqjen nga funksionet e larta drejtuese, duke e konsideruar këtë një mundësi të barazisë së tij me gazetarët si palë e akuzuar, në raport me proceset gjyqësore që ai ka hapu,” thuhet në deklaratën e Unionit të Gazetarëve.