Në garën zgjedhore të së dielës, numri i votuesve në Berat ra me mbi 8 mijë në krahasim me katër vjet më parë, ndërsa lista e votuesve është rritur me gati 5 mijë vetë. Megjithatë, socialistët arritën të marrin 2,500 vota më shumë se katër vjet më parë duke lënë PD dhe LSI më me pak vota.
Rreth 85 mijë banorë të Qarkut Berat morën pjesë në zgjedhjet e së dielës nga 180 mijë votues të regjistruar, një palë zgjedhje në të cilat gara mes palëve qe për të mos humbur një deputet më shumë se sa për të fituar një deputet shtesë në krahasim me katër vjet më parë.
Qarku i Beratit nxori shtatë deputetë këtë vit, nga 8 që pati nxjerrë katër vjet më parë. Partia Socialiste arriti të marrë 45 mijë vota, rreth 2,500 më shumë nga 2013, ndërkohë që PD shënoi nivelin më të ulët në histori me 16 mijë vota, duke humbur gati 3 mijë vota në krahasim me zgjedhjet e kaluara. Surpriza ishte që edhe Lëvizja Socialiste për Integrim, e cila e konsideron Qarkun e Beratit si një shtëpi të vetën, pësoi një rënie prej 1900 votash në krahasim me zgjedhjet e kaluara.
Rënia në vota e LSI nuk ndryshoi gjë në numrin total të mandateve të saj në këtë qark, ku ajo fitoi dy mandate më 2013 dhe po dy më 2017. LSI ka pasur prezencë të fortë në Qarkun Berat që nga themelimi i saj. Në vitin 2005, Ilir Meta fitoi garën e vetme në maxhoritar në Skrapar, vendin e tij të lindjes. Por rënia e numrit të votave për këtë parti në Berat, qark ku ajo kontrollon tre nga pesë bashkitë, është një nga të paktat raste ku beteja e PS kundër saj duket se ka funksionuar. LSI mori rezultat më të mirë se sa më 2013 në shumicën e qarqeve të tjera.
Rezultati më negativ qe ai i Partisë Demokratike. Demokratët patën fituar 22 mijë vota më 2009 dhe 19 mijë vota më 2013. Të dielën ata morën 16 mijë vota, rreth 4 mijë vota më pak nga sa nevojiteshin për të ruajtur mandatin e dytë. Për rrjedhojë, PD është partia që humbi mandatin e hequr nga Berati për shkak të ndryshimeve demografike ndërsa PS e LSI ruajtën rezultatin e vitit 2013 në mandate.
Socialistët arritën të ruajnë rezultatin me katër mandate deputetësh në Berat duke vendosur në pozicionin e rrezikuar, të katërtin në listën e tyre, Fadil Nasufin [CV Link], ish kryebashkiak i Beratit dhe ish-prefekt. Nasufi, 59 vjeç, ish-mësues, ka punuar si sekretar i parë në Bashkimin e Rinisë së Punës së Shqipërisë në vitet e fundit të komunizmit dhe si funksionar i degës lokale tëPartisë Socialiste pas rënies së Komunizmit. Gjatë fushatës së zgjedhjeve, ai u kallëzua në Prokurori nga ministri teknik i Drejtësisë, i emëruar nga Partia Demokratike me akuzën se kishte shpërndarë tituj pronësie gjatë fushatës elektorale.
Lista e socialistëve për Beratin u drejtua nga Blendi Klosi, i diplomuar në inxhinieri elektronike, deputet për Partinë Socialiste në katër legjislaturat e fundit. [CV link]. E dyta në listën e socialistëve qe Ermonela Valikaj, [CV Link] ministre e Marrëdhënieve me Parlamentin, e diplomuar në drejtësi dhe në Shkollën e Magjistraturës, ish-prokurore në Berat.
I treti qe Adnor Shameti, avokat. [CV Link].
Për partinë Lëvizja Socialiste për Integrim nga Berati do të jenë në parlamentin e ardhshëm Nasip Naço, ish-ministër i Drejtësisë [CV Link] dhe Gledjon Rehovica, [CV Link] i diplomuar në shkenca politike dhe që ka punuar si zëvendësdrejtor i Posta Shqiptare dhe Drejtor i Përgjithshëm në Drejtorinë e Metrologjisë.
Për Partinë Demokratike i vetmi që do të hyjë në parlament është Eduart Halimi, [CV Link] avokat dhe deputet që nga viti 2009.
Abonohu te buletini ynë[email-posts-subscribers namefield=”YES” desc=”” value=”Abonohu”]
