Xhelal Mziu është kallëzuar për shpërdorim detyre, pasi akuzohet nga IKMT se ka përdorur vendimet për prishjen e ndërtesave pa leje si “mjet presioni apo favorizimi në fushatë”. Mziu i quan akuzat “hakmarrje e pastër politike” dhe fajëson qeverinë për ndërtimet pa leje.
Inspektorati Kombëtar i Mbrojtjes së Territorit, IKMT ka kallëzuar në Prokurori kryetarin e Bashkisë së Kamzës, Xhelal Mziu, të cilin e akuzon se nuk ka vepruar për të prishur ndërtimet pa leje gjatë muajve Maj-Qershor. Në një njoftim për shtyp, IKMT hedh dyshime se vendimet kundër ndërtimeve pa leje lidhen me periudhën e fushatës elektorale dhe se mund të jenë përdorur si mjet presioni apo favorizimi, ndërkohë që e akuzon kryebashkiakun për shpërdorim detyre.
Në kallëzimin e saj, IKMT thekson se janë marrë 89 vendime për prishje objekti, 48 prej të cilave i përkasin periudhës maj-qershor 2017. Megjithatë, asnjë prej vendimeve nuk është ekzekutuar.
“Pavarësisht kërkesave të vazhdueshme të kryeinspektorit drejtuar kryetarit të bashkisë si organi epror për sigurimin e mjeteve për ekzekutimin e këtyre vendimeve, nga ana e kryebashkiakut nuk është ndërrmarrë asnjë veprim”, thuhet në njoftimin për shtyp të Inspektoriatit.
“..Pjesa më e madhe e vendimeve për prishje objekti janë marrë në periudhën parazgjedhore, fakt që ngre dyshime të arsyeshme se janë përdorur si mjet presioni apo favorizim personash me qëllim përfitimi elektoral,” thuhet më tej në njoftimin e IKMT.
Kryebashkiaku i Kamzës, Xhelal Mziu e cilësoi kallëzimin “një hakmarrje të pastër politike” përmes një postimi në faqen e tij në Facebook. Ai u kundërpërgjigj me akuzën se ishte qeveria ajo që lejoi ndërtime pa leje gjatë fushatës elektorale.
“Pas humbjes dërrmuese në Kamëz me plus 5 mijë vota, gjendet një “sebep” që qeveria të sulmojë sërish emrin e kryebashkiakut Xhelal Mziu, duke e kallëzuar atë në prokurori,” shkruan Mziu.
“Qeveria lejoi ndërtimet pa leje në këmbim të votës. Në Tiranë, Durrës etj. është ndërtuar pa leje jo vetëm shtëpi, por edhe vila, pallate, madje në prona publike dhe me paratë e krimit, korrupsionit, drogës”, shton Mziu në postimin e tij.
Përplasja e fundit mes kryebashkiakut të Kamzës dhe institucioneve të qeverisë qëndrore mbi ndërtimet pa leje filloi gjatë javës së fundit të fushatës elektorale. 7 ditë para zgjedhjeve, Xhelal Mziu u shfaq në një klip të shkurtër ndërsa bënte fushatë për Partinë Demokratike, ku kërcënonte se do të prishte shtëpitë që kishin vendosur flamujt e PS dhe LSI-së. “Kush ka vendosur flamurin e PS dhe të LSI le ta heqë brenda ditë së sotme sepse nesër do t’i prishim edhe shtëpinë edhe flamurin,” dëgjohet të thotë Mziu.
Menjëherë pas kësaj, Policia e Shtetit njoftoi nisjen e procedimit penal për Mziun me akuzën e kërcënimit.
“Më datë 19.06.2017, u referuan materialet në Prokurorinë e Rrethit Gjyqësor Tiranë për shtetasin Xh. M., 50 vjeç, banues në Kamëz, sepse në një portal informativ, ka kanosur se do prishë shtëpitë e të gjithë banorëve në Kamëz, të cilët mbajnë flamur të partive politike të dy subjekteve politike, nëse nuk i heqin ata brenda ditës”, thuhej në njoftimin e policisë.
Kryeministri Edi Rama u kujdes ta shpërndante vetë videon, duke e cilësuar atë si “kërcënim nga bodrumi”. Vetë kryebashkiaku Mziu e cilësoi videon një keqkuptim dhe kërkoi ndjesë një ditë më pas, ndërsa theksoi se fjala e tij ishte keqpërdorur dhe se ai po fliste “rreth ndërtimeve pa leje që po lulëzojnë nën mburojën qeveritare”.
Kjo nuk është hera e parë që kryebashkiaku Mziu kallëzohet penalisht për “shpërdorim Detyre”. Ai u arrestua me këtë akuzë, në lidhje me një tender të bashkisë në dhjetor të vitit 2013 dhe u dënua në Gjykatën e Shkallës së Parë, por fitoi pafajësinë në Gjykatën e Apelit në vitin 2014. Çështjes i është bërë rekurs nga prokuroria dhe pritet ende gjykimi në Gjykatën e Lartë.
