Një gjykatë e shpalli Petar Nizamov të pafajshëm për kufizimin e paligjshëm të lirisë së tre migrantëve afganë, megjithëse video e arrestimit nga ana e tij shkaktoi një zemëratë ndërkombëtare vitin e kaluar.
Gjykata rajonale në qytetin bregdetar të Burgas vendosi të enjten se ndërsa ‘arrestimi nga qytetarë” të migrantëve afganë më 10 prill 2016 ishte padyshim i paligjshëm, prokurorët nuk ia dolën të ofrojnë mjaftueshëm prova se Nizamov ishte fajtor.
Gjykatësit gjetën disa mangësi në hetim, përfshirë faktin se afganët e identifikuan Nizamov përmes fotografive dhe një video të “arrestimit” që ai e hodhi në faqen e tij në Facebook, në vend që të bëhej përmes një identifikimi fizik mes disa të dyshuarve, siç e kërkon ligji.
Mungonin gjithashtu firma në protokolle dhe dokumente të identifikimit nga punonjësit e policisë.
Vendimi i gjykatës është i formës së prerë dhe nuk mund të apelohet.
Prokuroria nisi një hetim pasi Nizamov publikoi në Facebook videon amatore të kapjes së emigrantëve të paligjshëm.
Në të shfaqeshin tre burra të shtrirë me fytyrë në tokë dhe me duart e lidhura pas kurrizit ndërsa gjahtari i migrantëve thërriste “Jo Bullgaria – kthehuni në Turqi!”
Arrestimet nga qytetarët janë të paligjshme në Bullgari, por janë bërë të përhapur mes grupeve nacionaliste që patrullojnë rregullisht kufirin e Bullgarisë me Turqinë.
Nizamov u arrestua sërish në korrik pasi sulmoi një kameraman të një televizioni privat, BTV, gjatë përplasjeve me policinë pas një proteste anti-romë në qytetin jugor të bullgarisë në Asenovgrad.
