Pas gjetjes së tre pakove postare me pjesë armësh Kallashnikovi në aeroportin e Rinasit, policia arrestoi një 32-vjeçar nga Shijaku ndërkohë që një person i dytë është shpallur në kërkim.
Policia e Shtetit njoftoi të shtunën se arrestoi një 32-vjeçar nga Shijaku i Durrësit, si autorin e dyshuar të nisjes së tre pakove me pjesë armësh automatike përmes postës ajrore dhe shpalli në kërkim një 47-vjeçar, ndërkohë që vazhdojnë hetimet për të zbardhur trafikimin e armëve në drejtim të Britanisë së Madhe.
Sipas policisë, i arrestuari është Saimir Çullhai, i dënuar më parë për akuzën e “trafikimit të narkotikëve”, i cili sipas hetimeve paraprake rezulton të jetë personi dërgues i tre pakove postare, brenda së cilave u gjetën pjesë të çmontuara kallashnikovi.
“…në kuadër të proçedimit penal të nisur për këtë ngjarje, është bërë e mundur të dokumentohet veprimtaria kriminale e shtetasve të sipërpërmendur, të cilët kanë bërë dërgimin e tre pakove me një prej agjencive të dërgesave postare, të cilat janë konstatuar gjatë skanimit në Aeroportin “Nënë Tereza…,” thuhet në njoftimin zyrtar të Policisë.
Sipas njoftimit, brenda tre pakove gjendeshin tre automatikë Kallashnikovë, destinacioni i të cilave ishte Londra. Hetimi provoi se armët luftarake ishin çmontuar dhe pjesët përbërëse të tyre ishin futur në pantallona dhe më pas ishin izoluar mirë me ngjitës në kuti kartoni, me qëllim shmangien nga vëzhgimi me sy të lirë.
Një burim pranë prokurorisë së Krimeve të Rënda, i cili foli për “BIRN” në kushtet e anonimatit tha se “jemi përballë një rasti të veçantë të trafikimit të armëve, pasi porosia, pagesa dhe komunikimi për inicimin e këtij trafiku, dyshohet të jetë kryer nëpërmjet internetit”.
Grupi i hetimit, nën drejtimin e Prokurorisë së Krimeve të Rënda nuk e ka ende të qartë se ku do të përfundonin armët dhe se sa është paguar për trafikimin e tyre. Për këtë arsye, strukturat e përfshira në hetim po mbajnë komunikime të vazhdueshme me autoritetet angleze për zbardhjen e plotë të ngjarjes.
Nga hetimet paraprake rezulton se emri i përdorur për të postuar pakot me pjesë armësh është i rremë. Emër dhe adresë të rreme dyshohet të ketë edhe personi që supozohej se do të priste pakot në Britaninë e Madhe.
Policia e Shtetit informoi se zbulimi i pakove të dyshimta nëpërmjet linjës ajrore Tiranë-Athinë-Londër u arrit falë masave të shtuara antiterror dhe skanimin e çdo kutie postare. Personi i vetëm i arrestuar si dërguesi i tre pakove ku ishin fshehur kallashnikovët e çmontuar, Saimir Çullhaj, është ndaluar pas një pune të mirëorganizuar nëpërmjet strukturave të antiterrorit dhe Prokurorisë së Krimeve të Rënda.
Çullhaj është arrestuar mbi bazën e provave filmike, që sipas policisë tregojnë se është ai personi që ka dorëzuar tre pakot në zyrat e kompanisë DHL në Durrës. Por një burim i grupit të hetimit i tha BIRN se ai nuk ka pranuar për asnjë moment se kishte dijeni mbi përmbajtjen e pakove të postuara.
32-vjeçari i ka thënë policisë se pakot i kishte dorëzuar në postë për një llogari të personit të shpallur në kërkim dhe se nuk e kishte idenë se brenda tyre ndodheshin pjesë armësh luftarake.
47 vjeçari me inicialet N.F, i përshkruar në deklaratën për shtyp të policisë si autor i ngjarjes është shpallur në kërkim policor, ndërkohë prokuroria ka kërkuar kundër tij në Gjykatën e Krimeve të Rënda masën e “arrestit në burg” në mungesë.