Shumica në Parlament votoi projekt-vendimet për strukturën dhe nivelin e pagave për institucionet e vetingut, duke shkurtuar me rreth 40 për qind propozimet fillestare. Rrëzohen amendamentet e PD dhe LSI.
Kuvendi i Shqipërisë miratoi në orët e para të mëngjesit të së premtes tre projekt-vendimet për strukturën dhe nivelin e pagave të institucioneve të vetingut, duke u dhënë atyre 40 për qind më pak punonjës se sa kishin kërkuar si dhe pagesa të barabarta me anëtarët e Gjykatës së Lartë apo të asaj Kushtetuese.
Shumica në Parlament rrëzoi gjithashtu amendamentet e Partisë Demokratike dhe Lëvizjes Socialiste për Integrim, të cilat kërkonin që propozimet e drejtuesve të institucioneve të rivlerësimit të miratoheshin pa asnjë ndryshim, në mënyrë që procesi i vetingut të ishte efikas dhe i pandikuar.
Sipas projekt-vendimeve të publikuara në faqen e Kuvendit, Komisioni i Pavarur i Kualifikimit do të ketë 50 punonjës nga 68 që u kërkuan, Kolegji i Apelimit do të ketë 37 punonjës nga 65, ndërsa Komisioneri Publik pësoi reduktimin më të madh. Ky institucion do të ketë 26 punonjës nga 52, që ishte propozimi fillestar.
Reduktimi i kërkesave të drejtuesve të institucioneve të vetingut shkaktoi debate të forta në mbledhjet e 19 dhe 25 shtatorit në Komisionin e Çështjeve Ligjore, ku deputetët socialistë i konsideruan propozimet për organikën të fryra. Kundërshtime pati gjithashtu edhe propozimi për nivelin e pagave me një shtesë për vështirësi në masën 200 %, i cili nuk u miratua.
Komisioni i Ligjeve i bëri fakt shkurtimet në mbledhjen e 25 shtatorit, ndërkohë që kryetarja e Kolegjit të Apelimit, Natasha Mulaj dhe Komisioneri Publik, Florjan Ballhysa i kundërshtuan ato.
“Ne nuk duam luks. Ne duam një strukturë që procesi të jetë efikas. Po e reduktuat dhe e çuat në këtë numër strukturën e Kolegjit të Apelimit, unë mendoj se ju po cenoni pavarësinë..,” tha Mulaj më 25 shtator në Komisionin e Ligjeve.
Këmbëngulja e deputetëve socialistë për të ndryshuar në mënyrë drastike propozimet për buxhetin të institucioneve të vetingut u shoqërua me debat si në Komisionin e Çështjeve Ligjore ashtu edhe brenda Partisë Socialiste.
Partia Demokratike dhe Lëvizja Socialiste për Integrim në opozitë e akuzuan mazhorancën se përmes këtij akti, kishte për qëllim të ushtronte presion apo kontroll mbi procesin e rivlerësimit të gjyqtarëve dhe prokurorëve.
“Qëllimi i vërtetë është që këto institucione të lihen pa kapacitete dhe pa mundësi për të realizuar vetingun, në mënyrë që këtë ta bëjnë më pas institucionet ndihmëse të kontrolluara nga Rama,” tha nënkryetari demokrat i Komisionit të Ligjeve, Eduard Halimi.
