Avokatja e Popullit në Bullgari dhe disa organizata kanë nënshkruar një peticion për Parlamentin Europian, për të vepruar urgjentisht kundër kompanive që shesin produkte me cilësi më të ulët në vende të ndryshme të Europës.
OJQ-të bullgare dhe Avokati i Popullit i bënë peticion Parlamentit Europian të hënën mbi çështjen e “standardeve të dyfishta” të ushqimit, duke kërkuar krijimin ose të një organi europian të centralizuar ose një rrjeti organesh kontrolluese kombëtare për të monitoruar cilësinë e ushqimeve dhe pijeve të shitura në BE.
Ata besojnë se ekzistenca ushqimeve me standarde të ulëta në rajonin e Europës lindore reflekton një praktikë të pandershme biznesi nga kompanitë që “gënjen dhe diskriminon” konsumatorët.
“Problemi nuk ka të bëjë vetëm me dinjitetin e bullgarëve dhe europiano-lindorë, por edhe me buxhetet e tyre [sepse] cilësia më e ulët nuk do të thotë domosdoshmërisht çmim më të ulët,” u tha gazetarëve Avokatja e Popullit, Maya Manolova.
Ajo theksoi një studim nga zyra e saj, publikuar në shtator, i cili zbuloi se pesë produkte ushqimore dhe pije me të njëjtin emër, kryesisht për fëmijë, jo vetëm kishin përbërës me cilësi më të ulët në Bullgari, por gjithashtu kushtojnë më shumë në Sofje se sa në Berlin ose në Vjenë.
Pas një vale ankesash nga Polonia, Hungaria, Republika Çeke dhe Sllovakia – agjencia bullgare e sigurisë ushqimore në qershor analizoi 31 ushqime dhe pije nga të njëjtat marka ndërkombëtare që shiten në Bullgari dhe në vendet e tjera të Europës Perëndimore.
Agjencia zbuloi ndryshime në përbërës në shumë nga këto produkte, përfshirë pijet pa gaz dhe lëngjet e frutave, ushqimet për fëmijë, produktet e bulmetit, ëmbëlsirat etj.
Rumania u bashkua gjithashtu me shtetet e tjera të Europës Lindore në fushatën kundër këtij “standardi të dyfishtë” në ushqimet dhe pijet e shitura në BE.
“Ne po përballemi me kërcënimin e ‘Europës me dy standarde’, përveç Europës me dy-shpejtësi që tashmë ekziston”, shkruhet në peticionin bullgar në Parlamentin Europian.
Disa OJQ dhe shoqatave profesionale e kanë nënshkruar atë, përfshirë Unionin e Mjekëve të Bullgarisë, Rrjetet Kombëtar të Fëmijëve, Bashkimin Kombëtar të Kuzhinierëve etj.
Manolova, e cila kërkoi mbështetjen e Avokatëve të të tjerë kombëtarë në BE për të nënshkruar peticionin, shprehu optimizëm për rezultatin e ankesave në BE, pasi kryetari i Komisionit Europian, Jean-Claude Juncker, kritikoi standardet e dyfishta në cilësinë ushqimore në të gjithë BE-në në shtator.
Megjithatë, ajo tha se nëse BE-ja nuk merr masa të shpejta dhe efektive për të mbrojtur konsumatorët e Europës Lindore, ajo do të nisë një Iniciativë Qytetare Europiane.
Kjo do të thotë se të paktën një milion qytetarë të BE-së, nga të paktën një e katërta e vendeve anëtare të BE, duhet t’i bëjnë thirrje drejtpërdrejt Komisionit Europian për të ndërmarrë veprime ligjore.
“Iniciativa Qytetare Europiane është arma më e fortë e demokracisë, por së pari duhet të provojmë të gjitha instrumentet e tjera,” tha Avokatja e Popullit të Bullgarisë.
