Social Demokratët e Zoran Zaev dhe partnerët e tyre në koalicion BDI, kanë vulosur fitoren në raundin e dytë të zgjedhjeve të së dielës. Opozita hodhi akuza për mashtrime në zgjedhje.
Social Demokratët e kryeministrit Zaev në Maqedoni konfirmuan mbështetjen e gjerë, duke fituar 18 nga 35 komunat ku u mbajtën të dielën votime. Partia e Zaev mori 39 komuna në raundin e parë të 15 tetorit ku së bashku me zgjedhjet e dyta tani ka 57 nga 81 komunat e Maqedonisë në drejtimin e saj.
VMRO-DPMNE, e udhëhequr nga Nikola Gruevski, pësoi një tjetër humbje dërrmuese, ku mori vetëm dy komuna në këtë raund të dytë. Në total, VMRO ka të ngjarë të ketë vetëm pesë kryekomunarë.
LSDM arriti të sigurojë fitore edhe në qytetin lindor të Shtipit, që konsiderohej gjerësisht si bastioni i fundit i madh i mbetur për VMRO-DPMNE. Partia gjithashtu mundi VMRO-DPMNE në komunat e Gazi Babës, Kisela Voda dhe Butel të Shkupit, të cilat tradicionalisht i përkisnin krahut të djathtë.
BDI fitoi në 11 komuna etnike shqiptare dhe arriti të ruajë dominimin e saj mbi rivalët kryesorë, si Aleanca për Shqiptarët dhe lëvizja BESA, të cilat krijuan së bashku një aleancë pas raundit të parë.
BDI siguroi një fitore në qytetin veriperëndimor të Tetovës dhe në komunën e Çairit në Shkup, që shihej si trofeu i zonave shqiptare. BDI arriti çuditërisht të fitojë në qytetin e Strugës, ku kreu i Aleancës për Shqiptarët, Zijadin Sela, ishte favoriti pas raundit të parë.
Megjithatë, partia humbi ndaj Aleancës në qytetin e Gostivarit dhe BESËS në komunën e Zelinos.
Komuna e Bërvenicës ishte e vetmja zonë në të cilën një kandidat i pavarur fitoi në raundin e dytë të votimit.
Opozita vazhdon
Minuta pas mbylljes së votimeve, VMRO DPMNE tha se nuk do t’i njihte rezultatet, pasi kishin dalë nga proces i parregullt.
Në një fjalim dramatik, lideri i partisë Nikola Gruevski deklaroi se zgjedhjet ishin jodemokratike, duke pretenduar për mashtrimin zgjedhor dhe presion të qeverisë ndaj votuesve.
“Për shkak të parregullsive zgjedhore, dhunimit të demokracisë dhe shtetit, VMRO-DPMNE nuk i njeh zgjedhjet lokale”, tha Gruevski, duke akuzuar policinë se ka ndihmuar qeverinë.
Gruevski bëri thirrje për zgjedhje të menjëhershme të menjëhershme dhe i dorëzoi qeverisë një listë me shtatë kërkesa, të cilat ai tha se do të siguronin votim të lirë dhe të drejtë. Lista kërkoi dorëheqjen e kreut të Komisionit Zgjedhor dhe ngritjen e një prokurorie speciale që do të hetonte parregullsitë në zgjedhjet e përgjithshme të parakohshme të vitit të kaluar dhe në këto zgjedhje lokale.
Kryeministri Zoran Zaev në përgjigjen e tij i kërkoi kundërshtarit politik të rishikojë qëndrimin e tij.
“Shpresoj që ata do të gjejnë guximin për të vepruar si një trup politik serioz. I bëj thirrje udhëheqjes së VMRO-DPMNE-së t’i vërë interesat e qytetarëve përpara,”, tha Zaev pas mbylljes së zgjedhjeve.
Vëzhguesit zgjedhorë nga OJQ-të MOST dhe Civil deklaruan se zgjedhjet vendore kishin qenë kryesisht të lira dhe demokratike, duke përmendur disa raste të izoluara parregullsish.
Vëzhguesit ndërkombëtarë të OSBE ODIHR nuk e kanë bërë ende publik vlerësimin e tyre për raundin e dytë, por thanë se i pari ka qenë demokratik dhe i lirë.
Zgjedhjet lokale u panë si test për qeverinë e re të Zaev, që erdhi në pushtet në maj pas një krize të gjatë politike të 11 vjet qeverisje nga VMRO DPMNE – akuzuar gjerësisht për tendenca autoritare dhe korrupsion.
Lidershipi i VMRO DPMNE aktualisht po akuzohet nga Prokuroria Speciale e formuar në vitin 2015, gjatë një periudhe krize, pas mashtrimeve në zgjedhjet e mëparshme.