Kategorizimi më i fundit për biznesin global nga Banka Botërore i renditi vendet e Ballkanit Perëndimor, si Maqedonia dhe Kosova në rend të favorshëm, por Bosnja, Kroacia dhe Shqipëria nuk ia dolën në pesëdhjetëshen më të mirë.
Gjashtë vende të Ballkanit – Maqedonia, Kosova, Mali i Zi, Serbia, Rumania dhe Bullgaria – janë renditur mes 50 vendeve kryesore në botë në Raportin e Të Bërit Biznes nga Banka Botërore për vitin 2018, publikuar të martën.
Maqedonia është ekonomia me performancë më të lartë në Ballkan, e renditur në vendin e 11 ndër 190 ekonomitë në mbarë botën në aspektin e cilësisë së rregullave të biznesit.
Por Kosova ia doli të ishte në 10 ekonomitë më të përmirësuara për periudhën 2016-2017, nga vendet e mbuluara nga raporti, duke u renditur në vendin e 40-të në përgjithësi.
Kroacia, Shqipëria, Greqia dhe Bosnja-Hercegovina mbetën jashtë 50 vendeve më të mira në botë, duke u renditur përkatësisht në vendet e 51, 65, 67 dhe 86.
Në publikimin për vitin 2018, raportet e Të Bërit Biznes fokusohen në fushën e reformave të dizajnuara për të krijuar vende pune. Studimi i Bankës ka dalë në përfundim se sipërmarrësit në 119 vende nga 190 gjithsej përfituan nga përmirësime në kuadrin rregullator në vitin 2016-2017.
Në total, u dokumentuan 264 reforma rregullatore të biznesit, 53 prej të cilave në dhjetë vendet që kanë arritur përmirësimet më të mëdha: Brunei, Tajlandë, Malavi, Kosovë, Indi, Uzbekistan, Zambi, Nigeri, Xhibut dhe El Salvador.
Raporti vlerëson cilësinë e rregulloreve në 11 fusha të biznesit, përfshirë hapjen e një biznesi, marrjen e lejeve të ndërtimit, ato të energjisë elektrike, regjistrimin e pronës, marrjen e kredive, mbrojtjen e investitorëve të pakicave, pagesën e taksave, tregtimin jashtë kufijve, zbatimin e kontratave dhe zgjidhjen e paaftësisë paguese.
Rregullimet e tregut të punës janë matur zakonisht, por këtë vit ato nuk u përfshinë në raport.
Kampionët kryesorë të renditjes globale këtë vit janë Zelanda e Re, Singapori dhe Danimarka. Tre vendet në fund të kategorizimit janë Venezuela, Eritrea dhe Somalia.
