Një 20-vjeçar mbeti i vrarë në aksidentin e dytë me vdekje brenda pak javësh në një galeri miniere në Zonën D në Bulqizë
Një 20-vjeçar u vra pasi u zu poshtë prej një masivi gurësh mesditën e sotme në një nga galeritë e kromit në Zonën D të minierës së Bulqizës. Sipas policisë lokale “në një nga galeritë private në pjesën jugore të minierës, e ashtuquajtura Zona D, ka ndodhur një aksident i rëndë, ku për pasojë ka humbur jetën tragjikisht një 20-vjeçar, teksa ishte duke punuar”.
Po sipas kësaj komunikate e cila nuk bën me dije emrin e kompanisë dhe as të administratorit apo përgjegjësit të sigurisë, mësohet se minatori Eduard Dama, është zënë poshtë një masivi shkëmbor gjatë kohës që ndodhej në galeri.
Vetëm pak javë më parë në të njëjtën galeri humbi jetën edhe një tjetër minator, Eris Keta 30 vjeç. Si Dama ashtu edhe Keta kanë qenë punonjës të të njëjtës firmë mineral nxjerrëse. BIRN mësoi nga burime të policisë se kompania që menaxhon galerinë ku ndodhën dy aksidentet është Brisel.sh.p.k. Po ashtu u mësua se ishin shoqëruar dhe më pas lënë të lirë një brigadier dhe një teknik i kompanisë, që janë pyetur për rrethanat e ngjarjes.
Shkak për aksidentet me pasoja fatale në miniera është mungesa e kushteve të sigurisë në punë, pasi prej vitesh në galeritë nuk investohet nga firmat që i shfrytëzojnë. Zona D ku ndodhi aksidenti, është cilësuar në vazhdimësi nga specialistët e minierës si më e pasigurta dhe disa herë është folur për mbyllje të saj.
