Një gjykatë në Prishtinë dënoi me burg katër aktivistë, përfshirë një deputet, me një total prej 21 vitesh e gjashtë muajsh, për hedhjen e një granate në ndërtesën e parlamentit të Kosovës në vitin 2016.
Ditën e premte Gjykata Themelore në Prishtinë shpalli katër aktivistë të Vetëvendosjes, përfshirë një deputet, fajtorë për shpërthimin e një eksplozivi në ndërtesën e parlamentit të Kosovës më 4 gusht 2016.
Gjykata dënoi me tetë vjet burg deputetin Vetëvendosjes Frashër Krasniqi, Atdhe Arifin me gjashtë vjet burg, Egzon Halitin me pesë vjet e gjashtë muaj dhe Adea Bautashën me dy vjet burg. Me përjashtim të Batushës, tre të tjerët do të çohen në paraburgim.
Familjet e të akuzuarve dhe dy deputete të Vetëvendosjes, Albulena Haxhiu dhe Donika Kadaj-Bujupi, ishin të pranishme për dhënien e dënimit dhe, gjatë dhënies së vendimit, pati përleshje midis policisë dhe publikut, kur gjyqtari kërkoi se ata që nuk heshtnin duhet të largoheshin nga salla.
Forcat Speciale u panë të mbërrinin në gjykatë menjëherë pas dhënies së vendimit.
Të katër të akuzuarit e kishin deklaruar veten të pafajshëm në seancën e mbajtur më 28 shkurt, duke thënë se aktakuza ishte politike.
Megjithatë, kërkesa e tyre për rrëzim të padisë dhe të akuzave u refuzua nga Gjykata Themelore.
Në padi ishte i përfshirë edhe një person i pestë, Astrit Dehari, i cili vdiq në paraburgim në Prizren në nëntor 2016 para se të ngriheshin akuzat kundër tij.
Vdekja e Deharit, e cila shkaktoi protesta nga grupe të shoqërisë civile, u cilësua si një akt vetëvrasjeje, edhe pse Vetëvendosja ka vazhduar të kërkojë një hetim ndërkombëtar.
Në sulmin e gushtit 2016, motoçiklistë hodhën një granatë ndërsa kaluan pranë ndërtesës së parlamentit në një rrugë tepër të populluar në Prishtinë. Pas shpërthimit, një njësi speciale policore rrethoi zonën. Askush nuk u lëndua.
Muajt e mëparshëm panë rritje tensionesh mes partive politike me deputetët e opozitës që hodhën gaz lotsjellës brenda parlamentit disa herë në një protestë për një marrëveshje me Serbinë, e cila i jepte më shumë autonomi komunave me shumicë serbe dhe marrëveshjen e demarkacionit me Malin e Zi.
