Gjykata e Hagës e dënoi me burgim të përjetshëm ish-kreun ushtarak serb të Bosnjës Ratko Mlladiç për gjenocid të boshnjakëve nga Srebrenica dhe krime kundër njerëzimit.
Të mërkurën Gjykata Penale Ndërkombëtare për ish-Jugosllavinë në Hagë e shpalli ish-komandantin e Ushtrisë Serbe të Bosnjës, Ratko Mlladiç, fajtor për gjenocid dhe krime kundër njerëzimit, duke e dënuar atë me burgim të përjetshëm për disa nga mizoritë më të këqija në Europë që nga Lufta e Dytë Botërore.
Mlladiç, 74 vjeç, u dënua për gjenocid në Srebrenicë në vitin 1995, përndjekjen dhe shfarosjen e boshnjakëve dhe kroatëve në të gjithë vendin, terrorizim të popullsisë së Sarajevës me një fushatë bombardimi dhe sulmi me snajperë, si edhe pengmarrje të paqeruajtësve të OKB-së.
Por ai u lirua nga akuzat për gjenocid në gjashtë komuna të tjera boshnjake në vitin 1992.
Mlladiç u largua nga salla e gjyqit në një pikë pasi ndërpreu seancën duke i bërtitur gjyqtarëve.
Ai u zemërua pasi ata refuzuan kërkesën e avokatit të tij mbrojtës për t’i shkurtuar procedurat gjyqësore për shkak të tensionit të lartë të gjakut.
Kur gjyqtari lajmëroi se Mlladiç dënohej me burgim të përjetshëm, viktimat boshnjake të luftës që ishin në sallën e gjyqit duartrokitën.
“Kjo tregon se s’mund të kryesh krime e të mos ndëshkohesh,” tha për BIRN Fikret Grabovica nga Shoqata e Prindërve Fëmijët e të cilëve u vranë Gjatë Luftës, një grup viktimash boshnjake të luftës.
Por djali i Mlladiçit, Darko, akuzoi Gjykatën e Hagës për njëanshmëri kundër babait të tij.
“Nuk habitem nga vendimi. Gjykata ishte e njëanshme që në fillim,” citoi të ketë thënë ai gazeta Telegraph.
Vendimi i ditës së mërkurë s’është përfundimtar dhe mund të apelohet.