Gjykata e Krimeve të Rënda miratoi kërkesën e Prokurorisë për të bllokuar lëvizjet jashtë vendit të ish-ministrit të Brendshëm, Saimir Tahiri, i cili hetohet prej dy muajsh për “trafik narkotikësh” dhe “korrupsion pasiv”.
Gjykata e Krimeve të Rënda vendosi të martën që t’i bllokojë pasaportën ish-ministrit të Brendshëm, Saimir Tahiri, pasi prokuroria pretendoi se kishte siguruar prova të reja kundër tij për llogari të hetimit që zgjat prej dy muajsh.
Tahiri akuzohet për veprat penale të “trafikut të narkotikëve” dhe “korrupsionit pasiv”, por situata e tij juridike u rëndua edhe më tej më 1 Nëntor, kur policia e Elbasanit arrestoi 25-vjeçarin Orest Sota dhe bllokoi në makinën e tij 865 mijë euro si dhe dy patenta për drejtim mjetesh lundruese të ish-ministrit të Brendshëm. Gjatë masës së arrestit për Sotën, Prokuroria pretendoi se paratë e gjetura në makinën e tij i përkasin Tahirit.
Një burim i Prokurorisë, i cili foli me BIRN në kushtet e anonimatit tha se gjatë masës së sigurisë në Gjykatën e Krimeve të Rënda, akuza paraqiti prova të reja të siguruara nga ekspertiza e tre telefonave celularë të Orest Sotës.
Avokati i Tahirit, Artan Hajdari shprehu dyshime për pretendimet e prokurorisë për prova të reja, duke e cilësuar lëvizjen e saj si “taktike”. Megjithatë, Hajdari tha se nuk mund të jepte një qëndrim pa lexuar vendimin e gjykatës, ndërsa shtoi se klienti i tij kishte shprehur që në fillim vullnetin për t’u vendosur në dispozicion të hetimit.
Telashet ligjore për ish-ministrin e Brendshëm nisën në mesin e tetorit, kur antimafia italiane shkatërroi një grup shqiptar të trafikut të drogës, mes të cilëve bënin pjesë edhe kushërinjtë e Tahirit, Moisiu dhe Florian Habilaj. Emri i Tahirit përmendej disa herë në bisedat e përgjuara prej vitit 2013 nga antimafia italiane, ku anëtarët e grupit shpreheshin për shuma të mëdha parash që duhej t’i jepnin ish-ministrit apo për dhurata të kushtueshme për familjarët e tij.
Të akuzuarit për trafikimin e tonelatave të kanabisit në jug të Italisë u përgjuan gjithashtu duke thënë se ata kishin në dorë segmente të policisë dhe të ushtrisë.
Pas publikimit të përgjimeve në Shqipëri, Prokuroria e Krimeve të Rënda i kërkoi Kuvendit autorizim për arrestimin e Tahirit, por kjo kërkesë u rrëzua me votat e mazhorancës si e pabazuar në prova. Më pas, Prokuroria iu drejtua gjykatës vetëm për të siguruar një urdhër kontrolli në shtëpinë e Tahirit.
Më 22 nëntor, Prokuroria e Krimeve të Rënda urdhëroi arrestimin e tre ish-drejtuesve në policinë e Vlorës si të implikuar në çështjen “Habilaj”. Urdhër-arrestet vazhdojnë të mbeten të paekzekutuara, pasi asnjë prej ish-drejtuesve të akuzuar nuk u gjet nga policia.
