Prokuroria në Kosovë tërhoqi kërkesën e saj para një gjykate në Prishtinë për lejimin e ekstradimit të Ugur Toksoy, një mësues i kërkuar në Turqi për dyshimet se ka lidhje me të ashtuquajturën Lëvizje Gulen, duke pezulluar procedurën.
Prokurori i Kosovës Ali Rexha të enjten tërhoqi kërkesën e tij për gjykatën për të lejuar ekstradimin e një shtetasi turk, Ugur Toksoy, i cili u arrestua më 27 tetor në bazë të një urdhri arresti të lëshuar nga Turqia.
Turqia e akuzon Toksoy se ka lidhje me të ashtuquajturën Lëvizje Gulen, e cila akuzohet se ka organizuar tentativën për grusht shteti nëkëtë vend korrikun e vitit të kaluar.
Gjatë seancës të përcaktuar për të vendosur mbi ekstradimin e Toksoy, prokurori Rexha i tha gjykatës se ai e tërheq kërkesën për shkak të mungesës së provave. Tërheqja e kërkesës do të thotë se procedura e ekstradimit pezullohet.
Avokati i Toksoy Adem Vokshi tha se Turqia nuk dha prova të mjaftueshme për të justifikuar kërkesën e saj për ekstradim. Kjo do të thotë se nëse ka prova të reja, prokuroria mund ta ripërsërisë kërkesën.
Vendimi për të arrestuar Toksoy e bëri Kosovën vendin e parë në Ballkan që ndalonte një mësues turk për lidhjet e dyshuara me klerikun mysliman Fetullah Gulen, i cili akuzohet nga Ankaraja se udhëheq një lëvizje terroriste.
Turqia pretendon se Toksoy është një nga udhëheqësit e lëvizjes Gulen, e cila nga Turqia quhet ‘organizata terroriste Fethullah”, ose ‘FETO‘. Ankaraja thotë se Toksoy gjendej në Kosovë për të mbledhur fonde, të cilat do t’i dërgonte në Turqi. Por këto pretendime janë hedhur poshtë nga Toksoy.
Gjykata në Prishtinë më 29 tetor dëgjoi se në Kosovë, Toksoy punoi si koordinator për organizatën Atmosfera, e cila drejton shkollën Hasan Nahi në Prizren.
Gulen, një ish aleat i presidentit të Turqisë Recept Tayyip Erdogan, tani jeton në ekzil në SHBA dhe këmbëngul se nuk ka lidhje me tentativën për grusht shteti.
Turqia ka arrestuar më shumë se 60 mijë vetë të dyshuar si ndjekës të Gulen në Turqi, ka mbyllur shkollat dhe kolegjet e lidhura me të dhe ka kërkuar që qeveritë e huaja të bëjnë të njëjtën gjë.
Zyrtarët turq kanë bërë presion mbi Kosovën dhe mbi shtetet e tjera në rajonin e Ballkanit që të mbyllin organizatat e lidhura me Gulen dhe shkollat si dhe të ekstradojnë në Turqi të dyshuarit si anëtar të kësaj lëvizjeje.
