Avokati i Shukri Xhelilit thotë se do të apelojë dënimin me 2 milion lekë gjobë, që gjykata dha ndaj klientit të tij në dhjetor. Xhelili u gjet fajtorë për mos deklarimin e 34 mijë eurove gjatë kohës që ishte kryebashkiak
Avokati i Shukri Xhelilit i cili u dënua në mes të dhjetorit të vitit që shkoi për “mosdeklarim dhe deklarim të rremë të interesave private (pasurisë)”, mbi bazën e kallzimit të ILDKPI-së, i tha BIRN se do të apelonte vendimin.
Xhelili sipas Prokuroria e Dibrës, nuk justifikonte me dokumente zyrtare kontratën për blerjen e një apartamenti në Durrës, me vlerë 34.000 euro, në emër të djalit të tij. Ai vetë pretendoi se blerja e apartamentit nuk ishte deklaruar pasi ishte bërë me kontratë kleringu.
Gjykata i dha të drejtë prokurorisë dhe vendosi të shpallë fajtorë Xhelilin i cili u dënua me gjobë, pas disa seancash të gjyqit që filloi në shtator, por që u shty disa herë për shkak të mosparaqitjes së ish-kryebashkiakut.
Avokati i Xhelilit, Skënder Osmanaj, i tha BIRN se ai do apelonte çështjen pasi Xhelili ka paguar sipas ligjit një gjobë nga ILDKP për mosdeklarim të pasurisë dhe tha se ai nuk mund të dënohej dy herë për të njëjtën çështje.
Ky është dënimi i dytë në rradhë për ish-kryebashkiakun e Dibrës, i cili përfundoi në fund të muajit Maj 2017 dënimin me 1 vit e 8 muaj burg, përfshi kohën e paraburgimit, për akuzën e “marrëdhënies seksuale ose homoseksuale duke shpërdoruar detyrën”.
Xhelili u arrestua në Maj 2016 pas trasmetimit të një kamera të fshehtë ku ai shfaqej duke i ofruar një vend pune një vajze në këmbim të favoreve seksuale. Xhelili, i zgjedhur kryebashkiak në Dibër në vitin 2015 si kandidat i Partisë Socialiste u shkarkua menjëherë nga kryeministri Edi Rama dhe Gjykata Kushtetuese rrëzoi ankimin e tij duke lënë në fuqi shkarkimin.
Ai u dënua fillimisht në Shkallën e Parë për “korrupsion pasiv” me 2 vjet e 8 muaj burg, por më pas Gjykata e Apelit e Krimeve të Rënda e ndryshoi akuzën dhe i uli dënimin me 1 vit. Xhelili u dënua edhe me 5 vjet heqje të drejte për ushtrim të funksioneve publike.
