Mbështetësit e partive politike në opozitë manifestuan në Bulevardin “Dëshmorët e Kombit” për të protestuar kundër qeverisë duke denoncuar lidhjet e saj me krimin dhe korrupsionin galopant.
Me thirrjet “Rama Ik”, protestuesit e opozitës mbushën bulevardin “Dëshmorët e Kombit” në Tiranë për të treguar forcën përballë qeverisë të përgatitur me skela dhe me kordonë policie të pajisur me maska antigaz mesditën e të shtunës më 27 janar 2018. Të organizuar nga partitë opozitare, kryesisht nga Partia Demokratike dhe Lëvizja Socialiste për Integrim, protestuesit mbanin pankarta ku denonconin “narkoshtetin” ndërsa udhëheqësit që folën në podium theksuan ‘nevojën për shpresë’ ndërsa pjesëmarrësve iu transmetuan pamje nga një kamp me azilkërkues shqiptarë në Francë si dhe një mesazh i regjistruar me Dritan Zaganin, ish-oficer policie i cili u arrestua në Shqipëri ndërkohë që denoncoi në vitin 2015 lidhjet e ish-ministrit të Brendshëm Saimir Tahiri me bandën e vëllezërve Habilaj në Vlorë dhe që aktualisht jeton si azilant politik në Zvicër.
“Në emër të opozitës dhe tuaj, kërkoj largimin e Edi Ramës dhe qeverinë e tij të paligjshme, krijimin e qeverisë antimafia, që do të luftojë krimin dhe do të çojë përpara reformën në drejtësi sipas Kushtetutës së Shqipërisë dhe do të përgatisë zgjedhjet e lira dhe të ndershme. Kjo kërkesë, ky akt solemn është vendimi popullor i kësaj proteste”, deklaroi kryetari i Partisë Demokratike Lulzim Basha.
Në protestë folën edhe udhëheqësit e tjerë të partive opozitare, Fatmir Mediu nga Partia Republikane, Agron Duka nga Partia Agrare Ambjentaliste, Vangjel Dule nga Bashkimi për të Drejtat e Njeriut dhe Monika Kryemadhi nga Lëvizja Socialiste për integrim.
“Ky vend ka qenë edhe pa bukë, por kurrë pa shpresë”, deklaroi Dashamir Shehi, një nga aleatët e opozitës që folën në podium.
“Kjo qeveri po i mbledh miliona shqiptarëve, për dritat, për ujë, për mjekun që duhet të jetë falas, për t’i dhënë miliona katër apo pesë vagabondëve,” shtoi Shehi.
“Shqipëria do t’i vërë çizmen Ramës, që e dhunoi, që nuk ka të ardhme, t’i themo sot ndal,” deklaroi kryetarja e partisë Lëvizja Socialiste për Integrim Monika Kryemadhi.
Incidenti i vetëm gjatë protestës ishte hedhja e disa fishekzjarreve të zhurmshme nga protestuesit për te oborri i kryeministrisë. Qeveria kishte marrë masa duke vendosur skela para hyrjes së kryeministrisë.
Partitë opozitare deklaruan se do të organizojnë protesta popullore për rrëzimin e qeverisë dhjetorin e kaluar, pasi maxhoranca parlamentare zgjodhi një kryeprokurore të përgjithshme të përkohshme, ndërkohë që PD dhe LSI kundërshtuan me forcë.
Opozita u përgatit për gati një muaj me rradhë për protestën e sotme dhe grumbulloi njerëz nga e gjithë Shqipëria.
