Kriza Venezuelane po lëviz pa pushim nga të qenit katastrofike në të qenit e paimagjinueshme. Profesori i Universitetit të Harvardit Ricardo Hausmann propozon një zgjidhje të rrezikshme për t’i dhënë fund vuajtjeve: rrëzimin e Presidentit Nicolas Maduro dhe,me mbështetjen e një force ushtarake rajonale, instalimin e një qeverie të re.
Niveli i mjerimit, urisë, vuajtjes njerëzore dhe shkatërrimit ekonomik ka mbërritur në një pikë ku bashkësia ndërkombëtare duhet të rimendojë atë se si mund të ndihmojë.
Shumë vëzhgues kanë besuar se ndërsa ekonomia e Venezuelës përkeqësohet, qeveria e Nicolas Maduro thjesht do të humbë pushtet. Në vend të kësaj, qeveria është bërë më e fortë. Ajo ilegalisht ka instaluar një Asamble Kushtetuese me fuqi të plota. Ajo ka çrregjistruar partitë e opozitës. Ka pushuar nga puna zyrtarë të zgjedhur dhe ka vjedhur tre palë zgjedhje vetëm përgjatë vitit 2017.
Skenari më i mirë për të dalë nga ky telash pa dyshim është ai i zgjedhjeve të lira dhe të ndershme për të zgjedhur një qeveri të re. Ky është Plani A për opozitën e Venezuelës, të mbledhur përreth një organizate të quajtur Mesa de la Unidad Democrática, dhe që po synohet të arrihet në bisedimet që aktualisht po zhvillohen në Republikën Domenikane. Por bie ndesh me logjikën që të mendosh se një regjim që është i gatshëm të vdesë urie miliona njerëz vetëm për të ruajtur pushtetin, të dorëzohet përballë kutive të votimit.
Një alternativë e dytë mund të jetë një grusht shteti i brendshëm, zgjidhje që natyrisht është më pak joshëse. Kjo është gjithashtu edhe jashtëzakonisht e pagjasë për shkak se forcat e armatosura janë në mënyrë tërësore të korruptuara nga regjimi.
Një alternativë e tretë është sanksionet e shënjestruara që janë vënë në diskutim dhe që po zbatohen. Por këto në rastin më të mirë funksionojnë ngadalë, tepër ngadalë në krahasim me kolapsin dramatik të ekonomisë së Venezuelës. Dhe në disa raste ato nuk funksionojnë fare, siç është rasti i Kubës, i Koresë së Veriut apo Iranit.
Kjo lë në diskutim një alternativë të katërt, e cila është një ndërhyrje ushtarake ndërkombëtare. Kjo është një alternativë e cila natyrisht frikëson shumicën e vendeve të Amerikës Latine, në veçanti Meksikën dhe vendet e Amerikës Qendrore, të cilat shpesh kanë qenë në anën e viktimave të ndërhyrjeve të tilla ushtarake. Por këto mund të jenë analogjitë historike të gabuara. Në fund të fundit, Simon Bolivar u bë Liberatori i Venezuelës falë pushtimeve që ai i organizoi me ndihmën e Nueva Granadans të atyre ditëve, Xhamajkës, Haitit dhe Mbretërisë së Bashkuar.
Pra, në lidhje me këtë zgjidhje, është koha për të menduar për këto gjëra dhe jashtë konvencioneve. Ja një zgjidhje: Asambleja Kombëtare, e cila u zgjodh me një shumicë prej dy të tretash nga opozita, në zgjedhjet që ishin jo të drejta por që gjithsesi ato i fituan, mundet të përdorë këtë shumicë për të shkarkuar Presidentin Maduro dhe për të emëruar një qveeri të re, e cila pas kësaj mund të kërkojë ndihmë ushtarake për të rivendosur kushtetutën. Ky koalicion vendesh, i cili mund të përfshijë Amerikën Latine, SHBA-në dhe Kanadanë si dhe vendet Europiane, mund të jetë një forcë që ndihmon për të çliruar Venezuelën, në të njëjtën mënyrë si Kanadezët, Australianët dhe Britanikët çliruan Europën Perëndimore më 1944-1945 me ndihmën e SHBA-së dhe në të njëjtën mënyrë siç veproi bashkësia ndërkombëtare në Bosnjë dhe Kosovë.
Një gjë e tillë nuk ka nevojë të kërkojë miratim nga Këshilli i Sigurisë së Kombeve të Bashkuara për shkak se forca ushtarake do të mund të thirret nga një qeveri e ligjshme që kërkon mbështetje për të ruajtur kushtetutën e vendit. Ekzistenca e një opsioni të tillë – vetë ekzistenca e opsionit – mund të mjaftojë për fuqizimin e alternativave të tjera, të tilla si bisedimet që po zhvillohen në Republikën Domenikane.
Është e qartë se një shpërthim i brendshëm në Venezuelë nuk është në interesin e askujt. Dhe kushtet në vend përbëjnë një krim kundër njerëzimit i cili duhet të ndalohet për arsye morale. Ndërsa bota debaton rrugën më të mirë përpara, ka vetëm një pyetje që mbetet pa përgjigje: sa jetë të tjera duhet të shkatërrohen para se të vijë një zgjidhje?
