Gjykata e Elbasanit arrestoi 11 persona, përfshirë dy ish-drejtues të Autoritetit Rrugor Shqiptar në lidhje me hetimin mbi një rrugë rurale që lidh Elbasanin me Gjinarin dhe që sipas prokurorisë “nuk u realizua”.
Dy ish drejtorë të Autoritetit Rrugor Shqiptar ishin mes 11 personave për të cilët gjykata e Elbasanit urdhëroi masën e sigurisë “arrest me burg” ose “arrest shtëpie” në lidhje me një tender të vitit 2009 për mirëmbajtjen e një segmenti rrugor 23 kilometra të gjatë që lidh qytetin e Elbasanit me fshatin malor të Gjinarit në zonën e Shpatit në Shqipërinë qendrore. Dashamir Xhika, ish-drejtor për periudhën 2013-2017, akuzohet për shpërdorim detyre.
Xhika, 47, është gjithashtu zyrtar i lartë i partisë Lëvizja Socialiste për Integrim (LSI), partia e tretë më e madhe në Shqipëri e cila ishte anëtare e koalicionit qeverisës PS-LSI deri vitin e kaluar.
Andi Toma, drejtor i rrugëve deri në vitin 2013 në kohën kur qeveriste Partia Demokratike në aleancë me LSI, u arrestua për të njëjtën arsye. Fshati Gjinar në zonën malore të Shpatit ka vuajtur prej kohësh vështirësi në qarkullim ndërsa rruga është shembur në shumë vende. Toma u akuzua në vitin 2008 krahas kryetarit të Opozitës Lulzim Basha në lidhje me prokurimin e autostradës Rrëshen-Kalimash, por çështja penale u pushua me vendim të gjykatës së Lartë në vitin 2009.
Rruga Elbasan – Gjinar u prokurua në vitin 2009 për 500 milionë lekë (3.75 milionë euro) dhe prokurorët thonë se ajo nuk u realizua.
Gjykata e Elbasanit urdhëroi gjithashtu arrestime, arreste në shtëpi dhe kontroll banesash për disa zyrtarë të tjerë si dhe për pronarin e firmës që fitoi tenderin, Kujtim Hysa të kompanisë “Vëllezërit Hysa”.
Dhjetorin e kaluar, Ministri i Infrastrukturës së Shqipërisë Damian Gjiknuri dorëzoi kallëzim kundër Xhikës në lidhje me ndërtimin e autostradës Tiranë- Elbasan pasi audituesit dolën në konkluzionin se Xhika kishte amenduar kontratën me dëme të vlerësuara në rreth 16 milionë dollarë. Nuk ka të dhëna për ecurinë e kësaj çështjeje në prokurori. Rruga Tiranë – Elbasan duhej të përfundonte së ndërtuari në vitin 2015 por afati i punimeve u shty vazhdimisht ndërsa kostoja u rrit.
LSI ra në opozitë pas zgjedhjeve të vitit 2017 pasi pati qeverisur si anëtare koalicioni për tetë vite, fillimisht me demokratët dhe më pas me socialistët.
Korrupsioni në prokurimet publike në Shqipëri perceptohet si shumë i lartë ndërsa hetimet dhe dënimet janë të rralla.