Gjykata vendosi se Alekt Hatija ishte dënuar dhe ka vuajtur njëherë dënimin në Shqipëri për akuzat mbi të cilat mbështetej kërkesa për ekstradim e Interpol Romës. Hatia është dënuar në Itali nga nga Gjykata e Milanos me 20 vjet burg për trafik narkotikësh, por gjykata thotë se vendimi është për të njëjtat raste trafiku për të cilat ai ishte dënuar në Shqipëri.
Gjykata e Durrësit rrëzoi kërkesën e Prokurorisë për të ekstraduar në Itali Alket Hatinë, i cili rezulton i dënuar në vendin fqinj për akuza të trafikut të narkotikëve. Gjyqtari Paulin Çera vendosi të mos pranojë kërkesën e prokurorisë, pasi sipas tij për akuzat për të cilat Hatija është dënuar nga Gjykata e Milanos, ai ishte dënuar më parë nga Gjykata e Krimeve të Rënda në Shqipëri dhe ka vuajtur dënimin.
Alket Hatija i cili u arrestua me 8 korrik të vitit që shkoi me urdhër të Prokurorisë së Durrësit, pasi u shpall në kërkim ndërkombëtar nga Interpol Roma, nisur nga një vendim i Gjykatës së Milanos në Itali e cila kishte dënuar Alket Hatinë me 20 vjet burg.
Pas arrestimit Gjykata e Faktit në Durrës e la të lirë Hatinë më 11 korrik 2017, duke përdorur si argument edhe pretendimin e mbrojtjes se ai ishte dënuar njëherë për këto vepra penale edhe pse gjykata nuk e kishte në atë moment vendimin e drejtësisë italiane, për të dalë në atë përfundim.
Vendimi i masës së sigurisë shkaktoi përplasje mes institucioneve të drejtësisë dhe u bë shkak për inicimin nga Ministria e Drejtësisë e një procedimi disiplinor ndaj gjykatësit Petraq Çurri. Gjykata e Apelit e rrëzoi atë vendim, por pas caktimit të masës së sigurisë me burg policia nuk e gjeti në banesë të kërkuarin nga Interpol Roma.
Ndërkohë pasi vendimi i Gjykatës së Milanos së bashku me kërkesën për ekstradim mbëritën në Tiranë dhe u përkthyen, gjykatës i rezulton se Hatija është dënuar në Shqipëri për të njëjtat çështje për të cilat është dënuar nga Gjykata e Milanos.
Hatija është dënuar me 10 vjet e 8 muaj burg në vitin 2010 dhe përfitoi liri me kusht në vitin 2014, pasi gjykata e quajti të drejtë kërkesën e tij për ta shlyer pjesën e mbetur të dënimit në shtëpi për shkak se “bashkëshortja vuante nga sëmundje kronike”.