BE-ja paralajmëroi Serbinë dhe Kosovën kundër “përshkallëzimit të çdo lloji”, teksa Kosova dërgoi forcat speciale në veri për të siguruar që zyrtarët e ndaluar serbë të mos hyjnë në vend.
Kosova dërgoi forca speciale të policisë në veri të vendit për të ndaluar hyrjen e ministrit të mbrojtjes serb Aleksandër Vulin dhe kreut të Zyrës Serbe për Kosovën, Marko Djuriç.
Ministri i jashtëm i Kosovës Behgjet Pacolli tha të hënën se ata do të arrestoheshin nëse përpiqeshin të hynin në Kosovë.
“As Djuric dhe as Vulin nuk kanë leje për të hyrë në Kosovë. Çdokush që hyn në Kosovë në mënyrë të paligjshme do të arrestohet, “shkroi Pacolli në Facebook.
Njësia Operative e Specializuar e Policisë së Kosovës është në gatishmëri rreth 200 metra nga kalimi i kufirit në Jarinje në veriun e Kosovës.
Serbia ka kundërshtuar praninë e kësaj njësie speciale në veriun e Kosovës të drejtuar nga serbët në të shkuarën, megjithëse paqeruajtësit ndërkombëtarë të KFOR-it kanë nënvizuar se forcat speciale mund të patrullojnë në të gjithë territorin e Kosovës pa nevojë për leje.
Zëdhënësja e BE-së, Maja Kocijançiç, tha për BIRN se mosmarrëveshje të tilla duhet të zgjidhen përmes dialogut të udhëhequr nga BE për normalizimin e marrëdhënieve.
“Mosmarrëveshjet… duhen zgjidhur përmes dialogut dhe jo përmes përshkallëzimit të çdo lloji”, tha ajo.
Kocijançiç shtoi se të dy palët “mbeten të përkushtuara ndaj dialogut të ndërmjetësuar nga BE-ja, siç rikonfirmoi përfaqësuesja e lartë e BE-së, Federica Mogherini të premten e kaluar”.
“Të gjitha çështjet me interes të përbashkët duhet të adresohen në kuadrin e dialogut që ka frymën e një normalizimi të vazhdueshëm të marrëdhënieve”, shtoi ajo.
Mediat vendase raportuan se Djuriç duhej të merrte pjesë në një diskutim që është pjesë e “dialogut të brendshëm në Kosovë” në Mitrovicën e Veriut, ndërsa Vulin planifikonte të vizitonte një familje serbe të Kosovës.
Presidenti serb Aleksandër Vuçiç thirri të martën një takim të Komitetit të Sigurisë Kombëtare në Beograd. Televizioni publik serb, RTS, raportoi se “situata aktuale në Kosovë” do të jetë në axhendë.
Mediat serbe raportuan gjithashtu se autoritetet e Kosovës ndaluan të dielën hyrjen e ministrit serb të kulturës, Vladan Vukosavljeviç.
Sipas medias, ai donte të vizitonte disa manastire dhe kisha të Kosovës.
Vukosavljeviç e quajti pretendimin për ndalim “të gabuar dhe absurd” dhe i tha RTS të hënën se vizita e tij ishte gati por më pas ai mori informacionin se “të ashtuquajturat autoritetet të Prishtinës nuk e lejonin atë”.
Megjithatë, policia e Kosovës të hënën tha se Vukosavljeviç nuk ishte ndaluar të hynte dhe se ishte vendimi i tij të kthehej në Serbi pasi kishte kaluar kufirin.
“Vukosavljeviç… u lejua të hynte në territorin e Kosovës… por pasi hyri, ai nuk shkoi në Mitrovicën e Veriut por u kthye vullnetarisht në Serbi,” tha policia.
Policia shtoi se Vukasavljeviç pritej të kalonte në kufirin e Merdares, por ai kaloi në Jarinjë.
Megjithatë, çdo makinë që hyn në Kosovë nga Serbia kontrollohet nga policia kufitare.
