Pasi Kosova deportoi një zyrtar të lartë serb, politikanët serbë në vend thanë se do të largohen nga qeveria e Kosovës dhe se do të krijojnë të pavarur Shoqatën e Komunave Serbe pa përfshirjen e Prishtinës.
Goran Rakiç, kryetari i partisë kryesore serbe të Kosovës, Lista Srpska, lajmëroi të martën se do të krijohet një Shoqatë e Komunave Serbe, e pavarur nga Prishtina dhe se partia që ai kryeson do të largohet nga qeveria e Kosovës.
“Informuam presidentin Aleksandër Vuçiç dhe ai tha se kemi mbështetjen e tij,” tha Rakiç pas takimit me Vuçiç në Beograd, duke shtuar se Shoqata do të formohet më 20 prill.
Këto vendime erdhën si përgjigje ndaj arrestimit dhe deportimit të hënën të drejtorit të Zyrës Qeveritare Serbe për Kosovën, Marko Gjuriç.
Krijimi i Shoqatës së Komunave Serbe në Kosovë për të përfaqësuar interesat e serbëve të Kosovës parashikohet nga marrëveshja e Brukselit e nënshkruar nga Beogradi dhe Prishtina në vitin 2013, por procedura ishte zvarritur që nga ajo kohë.
Pas takimit të Vuçiç me Listën Srpska, Gjuriç e shmangu pyetjen nëse Serbia do të largohet nga dialogu i ndërmjetësuar nga BE me Kosovën në Bruksel, që synon normalizimin e marrëdhënieve.
“Mendoj se të dyja palët e treguan me veprime se çfarë mendojnë për dialogun,” tha Gjuriç.
Ai pretendoi se veprimet e policisë së Kosovës përfaqësonin një përpjekje për të kontrolluar veriun e dominuar nga serbët, ku u arrestua të hënën.
Autoritetet e Kosovës e deportuan Gjuric pasi policia e arrestoi në veri të qytetit të ndarë të Mitrovicës, duke e akuzuar për hyrje të paligjshme në vend.
“Ata u përpoqën të më frikësonin duke më vënë një kallashnikov në bark dhe njëri prej tyre më kërcënoi me thikë”, tha Gjuriç.
Në përgjigje të incidentit, Vuçiç thirri Komitetin për Sigurinë Kombëtare të hënën, pas së cilës ai deklaroi se udhëtimi i Gjuriç në Kosovë nuk e shkeli marrëveshjen e Brukselit.
Rakiç nga ana tjetër u shpreh se incidenti i së hënës ishte një “provë” që tregonte si forcat shqiptare të Kosovës mund të “marrin në kontroll” veriun e Kosovës.
Ai u bëri thirrje serbëve të mos i bashkohen forcave të armatosura të Kosovës për të shmangur një situatë të mundshme në të ardhmen ku “vëllai të luftojë kundër vëllait”.
Kryeministri i Kosovës, Ramush Haradinaj, kërkoi të martën një mbledhje të Komitetit të Kosovës për Sigurinë Kombëtare.
Ndërkohë, Përfaqësuesja e Lartë e BE për Punë të Jashtme dhe Sigurinë, Federica Mogherini do të vizitojë Beogradin të martën pasdite për të biseduar me Vuçiçin për të ardhmen e dialogut të ndërmjetësuar nga BE me Kosovën, sipas zëdhënëses së BE-së Maja Kocijançiç në Twitter.