Gjykata e Tiranës dënoi me 10 vjet burg biznesmenin Adrian Xhillari për pastrim parash, ndërsa dha pafajësi për ish-nëndrejtoreshën e doganave, Lula Njebza dhe ish-kreun e doganës së Tiranës, Mirëarbër Teneqexhiun, të akuzuar për shpërdorim detyre.
Gjykata e Shkallës së Parë në Tiranë vendosi dënimin me 10 vjet burg për biznesmenin Adrian Xhillari, i cili gjykohet në mungesë për akuzat e “fshehjes së të ardhurave”, “mospagimin e taksave” dhe “pastrim e produkteve të veprës penale ose veprimtarisë kriminale”.
Ndërkohë gjykata vendosi që ish-nëndrejtoreshën e doganave, Lula Njebza dhe ish-kreun e doganës së Tiranës, Mirëarbër Teneqexhiun, të cilët akuzohen për shpërdorim detyre në bashkëpunim ishin të pafajshëm. Në vendim, gjyqtarja Adriana Bera shpalli edhe dënim me mbyllje të aktivitetit si person juridik edhe të kompanisë “Tea Construction and Petrol”.
Por përfaqësuesja e prokurorisë së Tiranës Suela Salavaçi, i tha BIRN se nuk ishte dakord me vendimin e dhënë nga gjykata dhe se shumë shpejt do e ankimojë vendimin në gjykatën e Apelit Tiranë. Salavaçi pretendon se ekzistojnë prova të mjaftueshme që faktojnë dhe fajësinë e dy ish-zyrtarëve të lartë të Drejtorisë së Doganave.
Nga ana tjetër të pakënaqur me vendimin ishin edhe mbrojtësit e Xhillarit, i vetmi që mori fajësi dhe ndodhet i arrestuar në Gjermani, kur pret procedurat e ekstradimit të tij për në Shqipëri. Përfaqësues të zyrës avokatore që mbron Xhillarin, thanë në dalje të gjykatës se nuk ishin dakord me vendimin dhe do kërkojnë pafajësinë në gjykatën e Apelit Tiranë.
Prokuroria kishte kërkuar në fillim të shkurtit fajësi për të tre të akuzuarit. Në pretencë prokuroria kërkonte dënim me 15 vjet burg për Xhillarin, 5 vjet për Njebzan dhe 3 vite burg për Teneqexhi. Ndërkohë mbrojtja e të tre të pandehurve kërkoi pafajësi.
Çështja ndaj Xhillarit dhe drejtuesve të doganës filloi pas një denoncimi nga Crown Agents, një kompani britanike e kontrakuar nga qeveria shqiptare për të ndihmuar doganat kundër kontrabandës në prokurorinë e Fierit në maj të vitit 2015. Në Dhjetor të po atij viti, prokuroria urdhëroi arrestimin e Njebzës dhe 6 doganierëve.
Në Maj 2016 Prokuroria e çoi çështjen për gjykim, duke akuzuar administratorin e kompanisë Tea Construction and Petrol, Adrian Xhillari për “fshehje të të ardhurave”, “mospagim i taksave” dhe “pastrim i produkteve të veprës penale ose veprimtarisë kriminale”. Akuzë u ngrit edhe për ish kreun e Doganës së Tiranës Mirëarbër Teneqexhiu dhe ish zv/drejtoreshën e përgjithshme Lula Njebza, si dhe doganierët Alfred Bushi, Syrja Misiraj dhe Adrian Alikaj për shpërdorim detyre e falsifikim dokumentesh.
Çështja ndaj Bushit dhe Misirajt u gjykua në Fier dhe u mbyll në Gjykatën e Apelit të Vlorës e cila dha pafajësi për doganierin Alfred Bushi, ndërsa dënoi me 1 vit burg doganierin tjetër Syrja Misiraj. Ndërkohë Adrian Alikaj, vijon të gjykohet në Fier.
Biznesmeni Xhillari, i cili është larguar nga vendi pasi u bë e njohur çështja ndaj tij, u arrestua në fillim të shkurtit në Gjermani pas dy vitesh arratie dhe pritet të ekstradohet.
Në pretencën prokuroria thotë se ai ishte fajtor për kontrabandimin e një sasi prej 4.4 milion litrash “naftë virgine”. “…nga analiza e fakteve dhe e provave të administruara gjatë këtij gjykimi penal, rezulton e provuar se i pandehuri Adrian Xhillari me cilësinë e përfaqësuesit ligjor dhe administratori i shoqërisë Tea Construcion & Petrol, dhe kjo e fundit si përfituese e veprimeve të kryera nga organet e saj drejtuese, ka kryer transportin “fiktiv” të sasisë prej 4.406.855 litra ose 3.251.688 kg të artikullit “naftë virgine” që ajo kishte depozituar në magazinën fiskale në “Kodër Mëzez”, Tiranë për në magazinën doganore Ballsh”, thuhet në pretencën e prokurorisë.
