Aktivistët protestuan në Sofje për të theksuar shqetësimet mbi planet e zhvillimit për Parkun Kombëtar të Malit Pirin ndërsa ministrat e mjedisit të BE-së u mblodhën për një samit informal në Sofje.
Protestuesit e “Save Pirin” mirëpritën ministrat e mjedisit të BE-së dhe komisionerin e mjedisit të BE-së Karmenu Vella në Sofje të martën me një protestë kundër një plani zhvillimor për Parkun Kombëtar të Malit Pirin.
Megjithatë, Vella tha se BE nuk ka gjetur asnjë shkelje të rregulloreve të saj nga autoritetet e Sofjes mbi planin e zhvillimit të parkut kombëtar të caktuar nga UNESCO në jugperëndim të vendit.
“Në këtë moment nuk mund të ndërmarrim masa kundër Bullgarisë për rastin e Pirinit, sepse nuk kemi arsye për ta bërë këtë dhe nuk ka shkelje të ligjit europian,” tha Vella për televizionin kombëtar bullgar të martën në mbrëmje.
Vella është në Bullgari për të marrë pjesë në një samit informal dy-ditor të ministrave të mjedisit të 19 vendeve anëtare të BE-së, pjesë e presidencës së radhës së Sofjes të Këshillit të BE. Temat për diskutim përfshinin zbatimin e rregullave mjedisore të BE-së.
Lëvizja “Save Pirin” ka që në dhjetor që proteston kundër një ndryshimi në planin e menaxhimit të parkut kombëtar nga qeveria bullgare për të lejuar zgjerimin e resortit të skive.
Edhe pse protestat e saj të përjavshme e kanë humbur vrullin gjatë javëve të fundit, ata prapëseprapë arritën të grumbullonin disa qindra protestues përpara Pallatit Kombëtar të Kulturës në Sofje, ku u zhvillua takimi i ministrave.
“Save Pirin” i dërgoi një letër të hapur dhe një videoklip të filmuar posaçërisht për këtë arsye ministrave dhe Komisionit të BE-së, duke bërë thirrje për shfuqizimin e vendimit të qeverisë për të ndryshuar planin e menaxhimit.
Aktivistë nga lëvizja “Za Zemiata” (Për Tokën) protestuan gjithashtu për ndotjen e ajrit duke vendosur maska gazi para Pallatit Kombëtar të Kulturës të martën pasdite.
