Gjyqtari Gjin Gjoni dhe bashkëshortja e tij kanë ankimuar vendimin e pushimit të padisë nga Gjykata e Tiranës, me argumentin se avokati i tij mungoi në seancë pasi ishte me raport mjekësor 1-ditor për “laringit acut”.
Gjyqtari Gjin Gjoni kundërshtoi në Apel vendimin e Gjykatës së Tiranës, e cila pushoi më 23 mars padinë për shpifje që ai dhe bashkëshortja e tij, Elona Çaushi kishin ngritur ndaj gazetës Shqiptarja.com dhe gazetarëve Elton Qyno dhe Adriatik Doçi.
Gjoni, i cili është njëherazi gjyqtar në Apelin e Tiranës dhe anëtar i Këshillit të Lartë të Drejtësisë kërkon përmes ankimimit të tij prishjen e vendimit të pushimit dhe kthimin e çështjes për rigjykim në shkallën e parë.
Gjyqtarja Alma Kolgjika Hoxha vendosi pushimin e padisë së çiftit Gjoni-Çaushi pasi avokati i tyre mungoi në seancën e prezantimit të konkluzioneve përfundimtare pa paraqitur “ndonjë shkak të arsyeshëm”.
Por sipas ankimimit të dorëzuar në Apel, avokati i paditësve, Ledio Braho pretendon se mungesa e tij ka pasur si arsye gjendjen jo të mirë shëndetësore, për të cilën ishte diagnostikuar me “laringit acut” dhe i është dhënë një ditë pushim nga mjeku i familjes.
“Qendra shëndetësore nr.2 në Tiranë është në një largësi të konsiderueshme nga vendondodhja e Gjykatës së Rrethit Gjyqësor Tiranë [3.5 kilometra], për më tepër që mëngjesi i datës 23.03.2018 ka qenë një mëngjes me rreshje…” argumentohet në ankimim.
Më tej shtohet se asistentja e ka dorëzuar kërkesën për shtyrje bashkë me raportin mjekësor në orën 8.45 minuta, por nuk ishte pranuar nga sekretaria e gjykatës me arsyetimin se ishte tej orarit të caktuar të seancës.
Me pretendimin se seanca gjyqësore ka nisur një minutë pas dorëzimit të raportit mjekësor dhe moskoordinit mes sekretarisë dhe gjyqtares së çështjes, ankimuesit i kërkojnë Gjykatës së Apelit që të prishë vendimin e pushimit të padisë dhe të rikthejë çështjen për rigjykim.
Gjin Gjoni dhe bashkëshortja e tij ngritën padi ndaj Shqiptarja.com dhe gazetarëve Qyno e Doçi në qershor të vitit të kaluar, me pretendimin se raportimet e tyre mbi hetimet e pasurisë u kanë shkaktuar cënim të personalitetit dhe shqetësim. Akuzuesit kërkonin përgënjeshtrim dhe një dëmshpërblim financiar prej 2 milionë lekësh nga Shqiptarja.com dhe nga 1 milionë lekë nga secili prej gazetarëve.
Ngritja e aktpadisë është kritikuar nga organizatat e medias brenda dhe jashtë Shqipërisë si një përpjekje për të frikësuar gazetarët dhe për t’i shtyrë ata drejt heshtjes.
Gjoni ka ngritur padi gjithashtu edhe ndaj Rrjetit Ballkanik për Gazetari Investigative Shqipëri (BIRN Albania) dhe gazetarëve Besar Likmeta e Aleksandra Bodgani. Çështja ndaj tyre vijon të shqyrtohet në Gjykatën e Tiranës.
