Një vendim i Gjykatës së Lartë Administrative ka gëzuar aktivistët e mjedisit që kërkojnë mbrojtje më të fortë për Parkun Kombëtar të Pirinit pas dyshimeve për ndërtime në të.
Gjykata e Lartë Administrative e Bullgarisë të martën anuloi një vendim të ish-ministres së mjedisit, Irina Kostova, për miratimin e një plani menaxhimi për Parkun Kombëtar të Pirinit pa ndërmarrë një vlerësim paraprak mjedisor.
Kostova, e cila ishte pjesë e qeverisë së përkohshme të Ognyan Gerdzhikov në pranverën e vitit 2017, lejoi aktualizimit të planit të menaxhimit për periudhën 2014-2023, duke pretenduar se ai lejonte vetëm aktivitete që nuk paraqisnin “një kërcënim të rëndësishëm për mjedisin”.
Vendimi i gjykatës synon një ndryshim të mëparshëm në plan dhe nuk ka lidhje të drejtpërdrejt me një vendim të mëvonshëm të ministrit aktual të mjedisit, Neno Dimov, në dhjetor 2017, që ka ngjallur protesta në mbarë vendin.
Dimov më pas e bindi qeverinë të lejojë ndryshime në planin që ambientalistët thanë se mund të lejojë ndërtime në Parkun Kombëtar.
Megjithatë, kundërshtarët e vendimit të Dimovit pohojnë se rasti është i ngjashëm dhe thonë se gjykata ka krijuar një precedent të mirëpritur, i cili mund të çojë në rrëzimin gjithashtu të vendimit të mëvonshëm.
WWF-Bullgaria, e cila e çoi në gjykatë vendimin e Kostovës dhe po udhëheq çështjen kundër vendimit të Dimovit, e lavdëroi vendimin dhe i kujtoi Dimovit se ai ka premtuar të respektojë vendimet e gjykatës.
Vendimi nuk është përfundimtar dhe ministria ka 14 ditë kohë për ta apeluar atë.
Në një zhvillim të veçantë, të martën, Gjykata e Bashkimit Europian vendosi kundër Bullgarisë për mos përmbushje të detyrimeve të saj për të mbrojtur një zonë të rëndësishme për zogjtë e rrallë në zonën malore Rila.