Disa dhjetëra aktivistë dhe kafshëdashës protestuan të hënën përpara Bashkisë së Tiranës, të zemëruar nga zhdukja e qenve të rrugës, të cilët ata besojnë se vriten çnjerëzisht nga bashkia.
Aktivistë dhe kafshëdashës u mblodhën të hënën përpara Bashkisë së Tiranës me thirrjet “vrasës” dhe “kriminel”, ndërsa akuzuan kryebashkiakun Erion Veliaj për shfarosje të qindra qenve të rrugës në kryeqytet.
Protesta e thirrur nga grupimi vullnetar për mbrojtjen e kafshëve, Animal Rescue Albania erdhi pas publikimit të një video nga vetë aktivistët, ku shfaqeshin në Sharrë kufoma të qenve të ngordhur dhe një kamionçinë në hyrje të landfillit të Sharrës, e ngarkuar me kufoma të qenve.
Të veshur me qese të zeza, me të cilat pretendohet se mbështillen qentë e vrarë dhe duke mbajtur në duar pankarta dhe foto të qenve të zhdukur, kafshëdashësit denoncuan rastet e qenve të zhdukur.
Protestuesit i kërkuan bashkisë të ndalojë vrasjet e qenve, por të ndjekë politika për sterilizimin e tyre, ashpërsimin e ligjit për dhunuesit e kafshëve, si dhe dorëheqjen e kryebashkiakut Veliaj.
Duke iu referuar qendrës së sterilizimit të qenve në Kombinat, aktivistët e quajtën atë një thertore të qenve endacakë dhe kërkuan ndjekjen penale të drejtuesit të saj.
Tirana mendohet se ka rreth 10 mijë qen endacakë. Organizatat në mbrojtje të kafshëve kanë denoncuar vazhdimisht tortura ndaj qenve të rrugës. Në nëntor 2017, ata dorëzuan në kuvend firmat për një projektligj që do të dënonte nga gjashtë muaj deri në dy vjet burg dhunuesit e kafshëve.
Aktivistët paralajmëruan vazhdimin e protestave.