Një minator 48 vjeç është plagosur rëndë dhe është trasportuar në spitalin e Traumës në Tiranë pasi u rrëzua në pikën e grumbullimit të kromit në galerinë e kompanisë Kaprolla Shpk në zonën e Martaneshit.
Një minator u plagos rëndë pas shembjes së tavanit të një galerie të nxjerrjes së kromit të enjten në Martanesh. Policia e Bulqizës njoftoi se 48-vjeçari Besnik Palamani, ishte duke punuar në galeri si vagonist, kur është rrëzuar në vendin e mbledhjes së mineralit duke marrë plagë të rënda*.
I aksidentuari është nxjerrë jashtë nga kolegët dhe është dërguar fillimisht për ndihmë mjekësore në spitalin e Bulqizës. Burime nga spitali i Bulqizës, bëjnë me dije se i aksidentuari kishte marrë plagë të rënda në trup, kryesisht në pjesën e kokës dhe është transportuar për në Spitalin e Traumës në Tiranë për të marrë një mjekim më të specializuar.
Policia konfirmoi plagosjen e 48 vjeçarit dhe në një njoftim për shtyp deklaroi se kanë nisur hetimet për zbardhjen e aksidentit. Por, ashtu si dhe në rastet e tjera të aksidenteve të konstatuara gjatë muajve të fundit, edhe kur aksidentet janë me pasojë humbjen e jetës së minatorëve, policia nuk e ka bërë publik emrin e kompanisë që menaxhon galerinë ku ndodhi aksidenti.
Gjatë muajve të fundit, 6 minatorë kanë humbur jetën në zonën e minerave të kromit në Klos dhe Bulqizë dhe disa të tjerë janë plagosur. Kromi është minerali më i rëndësishëm i Shqipërisë nga pikëpamja ekonomike. Aktualisht ka rreth 110 kompani të licencuara për të shfrytëzuar rezervat e kromit në zonën e Bulqizës. Të dhënat e fundit të disponueshme tregojnë se vlera e kromit të nxjerrë në Bulqizë dhe të eksportuar, kryesisht në Kinë, arrin në rreth 100 milionë euro në vit.
*Në këtë shkrimi u saktësua se aksidenti nuk ka ndodhur nga shembja në tavanin e minierës, por si pasojë e rrëzimit të minatorit në pikën e grumbullimit të kromit.
