Një marrëveshje me Uashingtonin pritet t’i sigurojë Malit të Zi qasje në të dhënat e inteligjencës të mbrojtjes dhe ushtrisë amerikane, si edhe t’i ofrojë atij teknologji të reja inteligjence në dobi të forcave të tij të armatosura.
Marrëveshja e sigurisë e nënshkruar nga SHBA-ja dhe Mali i Zi do të lejojë shkëmbimin e të dhënave të sigurisë në sferën e mbrojtjes dhe ushtrisë dhe do t’i ofrojë Podgoricës qasje në teknologjitë e reja të inteligjencës.
Sipas marrëveshjes, të cilën BIRN e ka parë, Mali i Zi do të mund të ketë qasje në të dhënat e inteligjencës së Pentagonit në nivelin më të lartë “top secret”, por vetëm sipas rregullave strikte dhe vetëm për personelin e autorizuar me lejen e nevojshme.
“Asnjë individ nuk do të ketë të drejtë të ketë qasje në informacione të klasifikuara vetëm në bazë të rangut, pozicionit, emërimit,” thuhet në marrëveshje.
Edhe pse Ministria e Mbrojtjes e Malit të Zi ka një krah sigurie dhe inteligjence, Agjencia e Sigurisë Kombëtare (ANB) e vendit do të jetë institucioni që është i autorizuar të ndajë të dhëna të klasifikuara me Pentagonin.
Marrëveshja gjithashtu përcakton rregullat logjistike për dërgimin e të dhënave të klasifikuara.
“Materiali, duke përfshirë pajisjet, që përmban informacione të klasifikuara duhet të transportohet në automjete të mbyllura dhe të mbuluara, ose do të paketohen apo mbrohen në mënyrë të sigurt për të parandaluar identifikimin e formës, madhësisë ose përmbajtjes së tij dhe do të mbahet nën kontroll të vazhdueshëm për të parandaluar qasjen nga persona të paautorizuar,” thotë marrëveshja.
Duke nënshkruar këtë marrëveshje, të dy vendet gjithashtu ranë dakord për një lloj inspektimi të zbatimit të kërkesave të sigurisë, duke u mundësuar atyre që të verifikohen nëpërmjet vizitave reciproke nga personeli i sigurisë nga Mali i Zi dhe SHBA-së.
Marrëveshja u negociua nga dy ministritë e mbrojtjes dhe u nënshkrua në shkurt në Uashington nga ministri malazez i mbrojtjes Predrag Boskoviç dhe sekretari i mbrojtjes i SHBA-së James Mattis, por përmbajtja e saj nuk u zbulua deri më tani.
Në një deklaratë për shtyp pas nënshkrimit, qeveria malazeze shkurtimisht tha se dy zyrtarët e mbrojtjes nënshkruan një marrëveshje në lidhje me masat e sigurisë për mbrojtjen e informacioneve të klasifikuara, e cila duhet të rrisë bashkëpunimin në shkëmbimin dhe mbrojtjen e informacioneve të klasifikuara, qasjen në informacione të klasifikuar dhe përfundimin e marrëveshjeve konfidenciale ndërshtetërore.
Gjatë takimit në SHBA, Mali i Zi u zotua gjithashtu të dërgojë më shumë trupa për misionin e udhëhequr nga NATO në Afganistan, duke u zotuar të rriste numrin e ushtarëve me 50 për qind.
Mali i Zi, anëtar më i ri i NATO-s pas anëtarësimit të tij në qershor, ka marrë pjesë me SHBA-në në misione të ndryshme në Afganistan për gati tetë vjet. Ai pati praninë më të madhe – 42 ushtarë – gjatë kohëzgjatjes së misionit ISAF.
Aktualisht janë 18 anëtarë të Forcave të Armatosura Malazeze që shërbejnë me kontingjentin e shtatë të misionit Mbështetje e Palëkundur në Afganistan.