Shoqatat e mediave në Mal të Zi kanë shprehur shqetësime mbi një kërkesë të policisë për informacione mbi reporterët e kronikës, duke e parë këtë si një shkelje të mundshme të të drejtave të tyre.
Shoqatat e mediave në Mal të Zi kanë kritikuar Drejtorinë e Policisë së vendit e cila kërkon një listë të gazetarëve që mbulojnë krimin e organizuar.
Policia thotë se i nevojitet ky informacion për të vlerësuar nëse gazetarët janë nën kërcënim.
Por organizatat e medias të dielën thanë se bërja publike e të dhënave personale të gazetarëve do të komprometonte punën e tyre me kontakte dhe burime dhe do të shkelte privatësinë e tyre.
Ata këshilluan stafin editorial dhe menaxherët e mediave ta shqyrtojnë me kujdes çështjen para se të bëjnë lista të tilla dhe t’i dërgojnë ato në polici.
Drejtoria e Policisë i dërgoi një letër të gjitha mediave në Mal të Zi të premten duke kërkuar emrat e gazetarëve të kronikës.
“Ju kërkojmë të na jepni emrat e gazetarëve në mediat tuaja që mbulojnë luftën kundër krimit. Emrat e gazetarëve janë të nevojshëm për të kryer një vlerësim të kërcënimit të sigurisë,” shkruhej në letër.
Kërkesa për emrat erdhi pasi gazetarja investigative Olivera Lakiç u qëllua dhe u plagos më 8 maj përpara shtëpisë së saj në kryeqytetin Podgoricë.
Kjo nuk ishte hera e parë që ajo u sulmua. Në vitin 2012, një burrë i veshur me të zeza e goditi atë po ashtu përpara ndërtesës ku ajo jeton.
Sulmi pasoi një sërë kërcënimesh që ajo kishte marrë që kur shkroi një sërë artikush për fabrikën e cigareve Tara dhe Kompaninë Malazeze të Duhanit në vitin 2011.
Zyrtarë, liderë partish, media, OJQ dhe përfaqësues të organizatave ndërkombëtare e dënuan sulmin, duke i kërkuar prokurorisë dhe policisë që ta hetojnë shpejt çështjen dhe t’i sjellin autorët para drejtësisë.
Por Mila Raduloviç, drejtoresha e Shoqatës së Medias në Mal të Zi, tha se kërkesa e policisë do të komprometonte punën e tyre dhe do të shkelte të drejtat e gazetarëve.
“Vlerësimi i sigurisë do të thotë që çdo gazetar do të kontrollohet nga Agjencia Kombëtare e Sigurisë që nga jeta e tyre personale e deri te kontaktet e tyre gazetareske. Kjo mund të komprometojë burimet e gazetarëve dhe do të ishte një shkelje e të drejtave dhe lirive personale siç garantohet nga Gjykata Europiane për të Drejtat e Njeriut,” tha ajo.
Gazetarët shpesh ankohen për kanosje të dhunshme në vendet e Ballkanit.
Në prill, siç njoftoi BIRN, një makinë bombë shpërtheu në qytetin Bijelo Polje para shtëpisë së gazetarit të njohur Sead Sadikoviç, i njohur për investigimet e tij mbi korrupsionin dhe krimin e organizuar. Nuk dihet nëse ai ishte objektivi.
Raporti i fundit i Amnesty International, i publikuar në mars, theksoi se shumë vrasje të kaluara dhe sulme ndaj gazetarëve dhe punonjësve të medias në Malin e Zi kanë mbetur të pazgjidhura.
Sulmi ndaj Lakiç mori një vëmendje të gjerë ndërkombëtare, duke krijuar tituj të pakëndshëm nëpër mediat e huaja në lidhje me pushtetin e krimit të organizuar në Mal të Zi, i cili e shikon veten si një kandidat kryesor për anëtarësimin në BE.