Pas arrestimit në Malin e Zi në dhjetor 2017 të një shqiptari të akuzuar për trafik narkotikësh, gjykata vendosi sekuestro pronat e tij dhe të afërmve në Bajzë të Shkodrës, përfshi një hotel dhe 15 mijë metra katrorë tokë.
Prokuroria dhe policia e Shkodrës sekuestruan një hotel, 15 mijë metra katrorë prona dhe disa ambjente të tjera, pasi pronari i tyre u arrestua disa muaj më parë me rreth 1 ton kanabis dhe 1.7 kilogramë heroinë në Malin e Zi
Në një komunikatë për shtyp policia e Shkodrës njoftoi se sekuestroja ishte miratuar në Gjykatan e Shkallës së Parë dhe se pasuritë ishin në emrin e të arrestuarit Ndue Pepaj dhe të afëmve të tij.
“U ekzekutua vendimi i Gjykatës së Rrethit Gjyqësor, Shkodër, (e cila) kishte vendosur sekuestron preventive të 7 (shtatë) pasurive të paluajtshme, tokë me sipërfaqe rreth 15 500 m2 dhe ndërtesa social-ekonomike me sipërfaqe rreth 450 m2, ku përfshihen Bar-Restorant, Hotel “Kavaliero”, Lavazh dhe Dyqan Cigaresh, në fshatin Bajzë, njësia Administrative Kastrat, bashkia Malësi e Madhe, në pronësi të shtetasit Ndue Vasel Pepaj dhe familjarëve të tij”, thuhet në njoftim.
BIRN nuk arriti të kontaktonte me përfaqësues ligjor apo të afërm të Pepajt.
Po ashtu bëhet me dije se hetimet rreth pasurisë së Pepajt kishin filluar pas arrestimit të tij dhe 11 shqiptarëve të tjerë më 17 dhjetor 2017. Në njoftim policia thotë se Pepaj ishte identifikuar nga autoritetet e vendit fqinj si “kreun i një organizate kriminale që vepronte në Mal të Zi dhe që merrej me trafikimin dhe shitjen e lëndëve narkotike”.
Ndërkohë njoftohet se hetimet po zhvillohen në bashkëpunim edhe me Prokurorinë Speciale të Malit të Zi, përfaqësues të së cilës vizituan ditët e fundit Prokurorinë e Shkodrës.
