Në rast të një marrëveshje përfundimtare me Greqinë për çështjen e “emrit”, Maqedonia planifikon të mbajë një referendum në shtator ose tetor, tha të mërkurën kryeministri Zoran Zaev.
Bisedimet midis Maqedonisë dhe Greqisë në lidhje me çështjen e emrit janë në një fazë “delikate” dhe “finale”, tha të mërkurën kryeministri maqedonas Zoran Zaev, duke shtuar se nëse një marrëveshje përfundimtare arrihet së shpejti, vendi planifikon të mbajë një referendum në vjeshtë.
“Ne të gjithë jemi dakord që në shtator ose në tetor të mbahet një referendum kur ne presim që qytetarët të na japin udhëzime për lëvizjet tona të ardhshme,” tha Zaev.
“Jam i kënaqur që Greqia e kuptoi se sa delikat është ky proces serioz dhe se duhet të pyeten edhe qytetarët. Shpresoj që qytetarët të jenë përgjegjës ndaj së ardhmes së Maqedonisë,” shtoi kryeministri.
Para mbajtjes së referendumit, Zaev tha se marrëveshja e pritshme do të kalohet për ratifikim në parlament në mënyrë që të mos humbasë kohë dhe kjo t’i japë mundësinë Greqisë të heqë bllokadën e saj për në NATO, në mënyrë që Maqedonia të ftohet t’i bashkohet aleancës në samitin e korrikut të NATO-s.
Greqia ka bllokuar ftesën e Maqedonisë për në NATO, si dhe fillimin e bisedimeve të saj për anëtarësim në BE për shkak të çështjes së pazgjidhur të emrit të vendit, të cilin Greqia e kundërshton.
Të hënën, Greqia dhe Maqedonia thanë se kishin arritur një “kompromis” për një kompromis të mundshëm në mosmarrëveshjen që zgjat prej dekadash.
Zaev tha se ai priste të kishte një telefonatë të rëndësishme së shpejti me homologun e tij grek, Alexis Tsipras, në lidhje me një marrëveshje përfundimtare.
“Sot, nesër ose e shumta të premten, do të flas me kryeministrin Tsipras, pas të cilës pres një përparim në bisedime,” tha Zaev.
Zaev nuk zbuloi detaje mbi kompromisin e mundshëm të emrit apo emrave që janë aktualisht në tavolinë, duke këmbëngulur se ai do ta zbulojë këtë sapo të arrihet një zgjidhje përfundimtare. Ai shtoi se, në çdo rast, identiteti i Maqedonisë do të mbrohet.