Kroacia pret këtë vit më shumë turistë dhe përfitime më të mëdha gjatë sezonit të pushimeve të verës, por ka shqetësime se mund të ketë një mungesë force punëtorë për t’i shërbyer turistëve.
Pas një para-sezoni të shkëlqyer, zyrtarët kroatë të turizmit po presin një verë fitimprurëse, por ekspertët janë të shqetësuar nëse vendi është gati për një fluks më të madh turistësh për shkak të mungesës së forcës punëtore.
Sipas të dhënave të fundit zyrtare nga Shërbimi Kroat i Punësimit, kërkesa për punëtorë në sektorin e turizmit po rritet çdo vit.
Në vitin 2007, numri i punëtorëve që nevojitej ishte 23,090, por kjo u rrit në 40,409 vitin e kaluar.
Numri zyrtar i punonjësve të turizmit të punësuar në vitin 2007 ishte 25,517, që e tejkalonte kërkesën, por në vitin 2017 numri i ishte 36,288 – më pak se numri i përgjithshëm i kërkuar nga punëdhënësit.
Eduard Andriç, kryetar i Sindikatës së Turizmit dhe Shërbimeve të Tregtisë të Kroacisë vlerësoi se këtë vit vendit i nevojiten të paktën 15,000 punonjës turizmi, pavarësisht kuotave të propozuara për punëtorët e huaj.
“Ministria e turizmit kishte numëruar punëtorë nga Bosnja, por ata gjithashtu nuk duan të punojnë këtu dhe ata do të preferonin më mirë një vend tjetër europian ku një kamerier mund të marrë një pagë më të lartë, strehim dhe vakte falas,” tha Andriç për BIRN.
Sipas Bordit Kroat të Turizmit, në periudhën nga janari deri në fund të marsit të këtij viti, ka pasur 2.3 milionë qëndrime prej një nate – 20 për qind më shumë se në vitin 2017.
“Përsa i përket numrit të rezervimeve për muajt e verës, duket se rezultatet do të jenë edhe më të mira sesa parashikuam ne,” tha ministri kroat i turizmit Gari Capelli më 24 maj në një intervistë për revistën e përjavshme kroate Globus.
Kur u pyet për punëtorët sezonalë, Capelli tha se qeveria ka rënë dakord të rrisë kuotën e punëtorëve të huaj në 4.600, dhe se ka një marrëveshje për të marrë gati 1.000 punëtorë nga Bosnja dhe Hercegovina dhe Ukraina.
Kroatët e papunë, sidomos nga pjesë të pazhvilluara të vendit, tani shkojnë jashtë vendit për të punuar diku tjetër në Bashkimin Europian në vend të bregdetit të Detit Adriatik. Gjatë viteve të fundit, ka pasur një valë emigrimi nga Kroacia në Gjermani.
Në vitin 2015, Gjermania hoqi kufizimet e punës mbi kroatët, duke u mundësuar atyre të punonin pa pengesa në vend.
Më parë, shumë kroatë të papunë zhvendoseshin në bregdetin e Adriatikut gjatë muajve të verës për të punuar në turizëm, katering dhe tregti, por kushtet e punës ishin të dobëta, me orë të gjata, paga të ulëta dhe akomodim joadekuat.
Jashtë vendit, ata kanë mundësinë të fitojnë më shumë për të njëjtën sasi pune.
Për shkak të mungesës së punëtorëve për sezonin turistik, shumë pronarë kroatë po përpiqen ta përballojnë këtë problem, sugjerojnë disa raporte.
Të premten e kaluar, gazeta rajonale Glas Istre raportoi për një shënim të varur jashtë një dyqani akulloresh në Pula, një qytet turistik kroat në skajin jugor të gadishullit të Istrias.
“Të dashur klientë, duke qenë se nuk po arrijmë të gjejmë një kamerier apo kameriere, aktualisht nuk mund t’ju shërbejmë në tavolinë. Kështu që ju kërkojmë me shumë mirësjellje të shkoni te banaku dhe të merrni vetë ç‘dëshironi,” thuhej në shënim.
Mario Paliska, kryetar i Dhomës së Tregtisë të Istrias, tha për Glas Istre se qarkut të tij i mungojnë rreth 500 ose 600 punëtorë sezonalë.