Duke konsideruar mungesat e shumta të palës paditëse një tallje me gjykatën, gjyqtari Astrit Faqolli vendosi pushimin e çështjes në të cilën Gjin Gjoni dhe bashkëshortja e tij pretendonin se tre shkrime të BIRN përbënin shpifje dhe kërkonin 7 milionë lekë dëmshpërblim.
Gjykata e Tiranës e pushoi çështjen në seancën e 11 të përballjes gjyqësore më 31 maj 2018, një vit pasi Gjin Gjoni dhe bashkëshortja e tij ngritën padi ndaj Rrjetit Ballkanik për Gazetari Investigative në Shqipëri dhe gazetarëve Besar Likmeta dhe Aleksandra Bogdani.
Gjyqtari Astrit Faqolli vendosi pushimin e çështjes pasi pala paditëse mungoi sërish në seancë ndërsa avokati i familjes Gjoni dhe Çaushaj, Ledio Braho, dorëzoi një raport mjekësor për të kërkuar një shtyrje tjetër. Faqolli argumentoi në seancë se mungesat e shumta të palës paditëse përgjatë të gjithë procesit gjyqësor nuk mund të justifikoheshin në numër kaq të lartë dhe se pala paditëse mund të ishte paraqitur vetë në seancë në mungesë të avokatit.
“Kjo është të tallesh me gjykatën”, tha Faqolli gjatë seancës.
Shpenzimet gjyqësore iu ngarkuan palës paditëse.
Gjin Gjoni, gjyqtar i gjykatës së Apelit në Tiranë dhe anëtar i Këshillit të Lartë të Drejtësisë ngriti padi ndaj BIRN në maj 2017 bashkë me bashkëshorten e tij Elona Çaushi, duke pretenduar cënim nderi nga tre shkrime investigative të publikuara në Reporter.al me autorë gazetarët Besar Likmeta dhe Aleksandra Bogdani. Por që nga korriku 2017 kur gjyqi u hap formalisht, nga 11 seanca gjyqësore të caktuara nga gjykata në katër raste pala paditëse nuk u paraqit me arsyetime të ndryshme, përfshirë, raport mjekësor për regjim shtrati për avokatin apo probleme të tjera. Disa seanca të tjera u mbyllën brenda pak minutave vetëm me marrjen në dorëzim të dokumenteve të ndryshme dhe me kërkesë të palës paditëse për të pasur më shumë kohë në dispozicion për të shqyrtuar dokumentet.
Avokati Dorjan Matlija, i cili përfaqësoi BIRN dhe gazetarët në këtë proces gjyqësor, tha pas vendimit të pushimit se zvarritja e procesit nga pala paditëse lidhej me faktin se pretendimet e tyre për shpifje nuk qëndronin.
“Procesi u zvarrit nga pala paditëse në vazhdimësi sepse gjatë gjykimit u bë gjithnjë e më e qartë se pretendimet e palës paditese nuk qëndronin,” tha Matlija. “Besoj që paditësi nuk kishte interes për një vendim negativ në prag të procesit të vetingut dhe për këtë arsye u përpoq të shtynte procesin në pafundësi”.
Krahas pretendimeve ndaj BIRN, Gjoni dhe Çaushi hodhën në gjyq gazetën Shqiptarja.com dhe gazetarët e saj Elton Qyno dhe Adriatik Doçi. Në 23 mars 2018, pas tetë muajsh procesi gjyqësor, gjykata vendosi edhe në këtë rast pushimin e çështjes pasi pala paditëse nuk u paraqit pa arsye në seancën gjyqësore ku duhej të parashtroheshin pretendimet përfundimtare.
Pak ditë më vonë, Gjoni e apeloi vendimin e pushimit në këtë çështje me pretendimin se avokati Ledio Braho, nuk kishte munguar pa arsye por për shkak se ishte i sëmurë me regjim shtrati.
Gjoni dhe Çaushi u ankuan për këto tre shkrime të BIRN:
Akuzat për një mal me ‘falsifikime’: dështimi i Prokurorisë në hetimin e Gjin Gjonit
Rihapet dosja e Gjin Gjonit, por gjyqtari mbrohet me vendim gjykate
Nga Gjin Gjoni te Sinojmeri; lista e 10 gjyqtarëve më të kamur në Shqipëri
