Pasi kryeministri i Kosovës tha se atyre mund t’u ulen pagat për të shpëtuar kompaninë, punonjësit në Telekom Kosova kanë paralajmëruar për greva dhe protesta.
Unioni që përfaqëson punëtorët e Telekomit të Kosovës, më parë Posta dhe Telekomunikacioni i Kosovës, PTK, ka paralajmëruar për greva nëse pagat e tyre shkurtohen – pasi kryeministri Ramush Haradinaj tha se një reduktim i pagës prej 20 për qind mund të nevojitet për të shpëtuar kompaninë nga falimentimi.
“Deklarata e kryeministrit ishte e gabuar. Mund të shkurtohen shpenzime të tjera të panevojshme. Dëmi i Telekomit nuk mund të mbulohet me pagat e punonjësve,” tha të enjten kreu i unionit për BIRN Lahim Balaj, pasi qeveria tha se nuk ka gjasa të sigurojë 60 milionë euro që Telekom i detyrohet kreditorëve të tij.
“Ne do të ndërmarrim masa. Tashmë kemi organizuar një këshill greve dhe jemi në pritje. Kemi diskutuar greva dhe protesta të mundshme,” tha Balaj.
Dikur kompania më fitimprurëse në Kosovë, problemet e Telekomit datojnë nga viti 2010 kur qeveria e udhëhequr nga Hashim Thaçi, aktualisht presidenti i Kosovës, ndaloi investimet e mëtejshme, duke pritur privatizimin e firmës.
“Privatizimi nuk ndodhi kurrë. Por në vitin 2010 ai humbi deri në 10 për qind të tregtisë së tij për shkak të bllokimit të investimeve nga qeveria,” tha për BIRN, një analist politike nga Instituti GAP i Prishtinës, Berat Thaqi.
“Kryeministri dhe ministrat e asaj qeverie nuk janë hetuar kurrë nëse ky vendim u mor si rezultat i lidhjeve të tyre,” shtoi ai.
Balaj tha për BIRN se keqmenaxhimi i qeverisë ishte faktori kyç që e shtyu Telekomin të Kosovës drejt falimentimit.
“Rreth 520 milionë euro u morën nga Telekomi nga qeveria deri në vitin 2015. Në vitin 2010, ata ndaluan projektet në emër të privatizimit dhe më pas i morën ato para si divident,” pretendoi Balaj.
Thaqi tha se pasi ndaluan investimet, të ardhurat kanë rënë vazhdimisht. “Menaxhimi i ka shërbyer palëve dhe klaneve dhe interesave të korruptuara, në vend që të rrisë vlerën e aseteve të kompanisë,” shtoi ai.
Telekomi ka pasur probleme financiare që nga viti 2015 gjithashtu si rezultat i rritjes së konkurrencës nga operatori tjetër mobil, IPKO, në pronësi të Telekom Slovenije.
Reuters raportoi në prill se Telekom Kosova raportoi një humbje prej 4 milion eurosh gjatë tre muajve të parë të këtij viti. Ai nuk publikoi shifra për vitin 2017, por humbja e përgjithshme e tij në vitin 2016 u vlerësua me 50 milionë euro.
Qeveria ka thënë se mund ta privatizojë kompaninë për dy vjet, sapo ajo të rifillojë të ketë fitime.
Por në fillim të këtij muaji Haradinaj tha se një zgjidhje ishte që të uleshin pagat me 20 për qind. “Po përpiqem ta shpëtoj këtë kompani. Ulja e pagave është një nga veprimet,” tha Haradinaj.
Telekom Kosova ka rreth 2,300 punonjës me paga mesatarisht prej rreth 1,000 euro në muaj. “Kjo kosto i kushton Telekomit 26 milionë euro në vit,” tha në maj ministri i Zhvillimit Ekonomik, Valdrin Lluka.
Haradinaj tha të martën se kompania ka nevojë për një investitor serioz dhe se qeveria nuk do të ndajë para shtesë për ta shpëtuar atë.
“Stop praktikës aktuale të shpenzimeve. Ne nuk do të japim para,” u tha Haradinaj gazetarëve të mërkurën, pas një takimi të qeverisë.
