Pronarët e makinave në Ballkan po përdorin rrjetet sociale për të shfryrë zemërimin e tyre dhe për të organizuar protesta ndërsa rritja e çmimit të naftës së papërpunuar po ndihet nëpër pikat e karburanteve.
Pronarët e makinave në Ballkan janë zemëruar për rritjen e çmimit të karburantit dhe kërcënojnë me protesta këtë muaj, duke rritur presionin mbi qeveritë për të ulur kostot për konsumatorët që i druhen një efekti të dobët në çmimin e ushqimit dhe mallrave të tjera.
Çmimet e naftës arritën maksimumin e tre viteve e gjysmë muajin e kaluar, duke kaluar dy herë çmimin 80 dollarë për fuçi dhe duke rritur kështu çmimet për pikat e karburanteve.
Konsumatorët në Ballkan janë sidomos të ndjeshëm ndaj rritjes së çmimeve duke pasur parasysh të ardhurat e tyre relativisht të ulëta.
Më shumë se 2,000 boshnjakë i janë bashkuar një grupi në Facebook të quajtur “Stop rritjes së çmimit të karburantit”, që po u bën thirrje shoferëve të ndalojnë makinat e tyre dhe të fikin motorët kudo që mund të jenë më 10 qershor në orën 17:00.
Në Serbi, shoferët pritet të protestojnë më 8 qershor duke bllokuar rrugët në kryeqytet, Beograd, njoftoi të martën televizioni rajonal N1. Atje, çmimi i naftës u rrit 4.8 për qind muajin e kaluar, ndërsa benzina ishte 6.2 për qind më e shtrenjtë.
Një litër benzinë oktan 95 në Serbi kushton rreth 1.3 euro, duke u rritur në 1.4 euro për benzinë më cilësore, në një vend ku paga mesatare neto është 459 euro.
Sipas të dhënave nga Dhoma e Tregtisë së Jashtme e Bosnjës, çmimi mesatar aktual i karburantit në Bosnje është 1.15 euro për litër. Paga mesatare pas taksave është pak mbi 400 euro.
“Nëse çmimet e karburantit e kalojnë 1,25 euro, kjo do të ndikojë në koston e ushqimit, duke e bërë kështu atë aq të shtrenjtë saqë do të jetë njësoj si të jetosh në Zvicër,” thuhej në një postim në grupin Facebook.
Në Malin e Zi, ku paga neto mesatare është pak më shumë se 500 euro në muaj, karburanti kushton mesatarisht 1.4 euro për litër, sipas agjencisë së statistikave Monstat.
Edhe pse shoferët në Malin e Zi ende nuk kanë njoftuar ndonjë protestë, zemërimi i tyre është i dukshëm në rrjetet sociale dhe Ministria e Ekonomisë e vendit tha qeveria do të diskutojë mbi çështjen e çmimit ë naftës të enjten, njoftoi media vendase.
Qeveria e Serbisë tha se po e monitoronte situatën. Organizata e Vendeve Eksportuese të Naftës, OPEC, do të takohet zyrtarisht më 22 qershor dhe mund të rrisë prodhimin për të ftohur tregun.
“Ne do të monitorojmë se si do të lëvizin çmimet në periudhën e ardhshme me shpresën se çmimi i naftës së papërpunuar dhe çmimi i derivateve të saj do të bien,” tha Aleksandar Antiç, ministër i minierave dhe energjisë në Serbi, të martën për Prva TV.
“Nëse kjo nuk ndodh, do të shohim se çfarë masash kemi në nivel qeveritar,” tha ai.
