Monedha shqiptare humbi 0.6% kundrejt euros dhe 0.4% kundrejt dollarit ndërsa kuotimet e bankave kryesore në vend sugjerojnë për vijimin e tendencës rënëse të lekut, gati një javë nga shpallja e ndërhyrjes së jashtëzakonshme nga ana e Bankës së Shqipërisë.
Të hënën, euro u kuotua në 128.3 lekë, gati 0.8 lekë më shumë se sa të premten. Që nga 5 qershori, kur euro shënoi minimumin shumëvjeçar në kuotën 124.17 lekë, leku shqiptar ka humbur në total 3,4% të vlerës, duke u kthyer në të njëjtën kuotë që gjendej në fund të muajit prill. Euro vijon të kushtojë 4.2% më lirë nga sa kushtonte në qershor 2017 dhe 8.3% më lirë se sa në fillim të vitit 2016, kohë kur leku filloi të forcohej.
Banka e Shqipërisë shpalli ndërhyrje të jashtëzakonshme në tregun e këmbimit valutor në vend më 6 qershor, kur Këshilli Mbikëqyrës vendosi blerjen e valutës së tepërt në vend me synimin e shmangies së forcimit të mëtejshëm të lekut. Ndërhyrja e BSH erdhi pasi leku u forcua me afro 3% kundrejt euros gjatë muajit maj, një ritëm ky shumë më i shpejtë se sa në muajt e mëparshëm.
Kursi mesatar i euros i ofruar nga disa banka të rëndësishme në vend ishte më i lartë se sa kursi mesatar fiks i publikuar nga Banka e Shqipërisë, një fenomen i pazakontë ky në tregun shqiptar që tregon pasiguri për ecurinë e mëtejshme të lekut.